Díli, yokalaumedia.com (11/12/2024) – Ministru Defeza, (MD), entrega karreta Tátika-10 ho marka BAIC ne’ebe akizi uza osan OJE 2024 hamutuk dolar rihun 60, ba Forsa Defeza Timor-Leste  (F-FDTL), simu direta husi Xefe Estadu Maiór Jenerál F-FDTL, Tenente Jenerál, Domingos Raul,  “Falur Rate Laek” iha kuartel jerál Fatuhada.

Viatura hirak ne’e atribui hodi fasilita servisu defesa tan klasifika nu’udar viatura tátika de uzu administrativu.

Pedro Klamar Fuik subliña katak, viatura sira ne’e  Komandante kompañia, Komandante peletaun sira mak sei utiliza iha térrenu hodi kontrola membru forsa sira nia progresa un no uza mos ba administrativu militár nian.

“Ita iha hanoin atu bele uniformiza ita nia militár sira, ho viatura ne’ebé mak karakteristika militár, atu ita bele hetan sira nia aprezentasaun nu’udar militár. Tanba ita nia dezenvolvimentu iha tinan 20 ne’e, ita hotu hatene sira uza karreta barak ho tipu oioin, maibé Nonu Governu Konstitusionál iha empeñamentu atu bele halo mudansa ba militár sira nia ekipamentu, material, hodi bele alkansa objetivu modernizasaun forsa nian”, afirma Governante.

Enkuantu Xefe Estadu Maiór, Jenerál F-FDTL, Tenente Jenerál, Domingos Raul “Falur Rate Laek”, agradese governu, liuhusi Ministériu Defeza, ne’ebe investe no dezenvolve ekipamentu materiál forsa nian hodi bele professionaliza no moderniza instrituisaun defesa refere.

“Ita ko’alia kona-ba, profesionalizasaun tenke iha meius, ekipamentu, buat hotu disponivel para ita haree militár sira professional. Ita dehan moderniza tenke iha regulamentu propriu hanesan lei hodi regula. Nune’e mós karreta 10 ne’e tenke iha ninia regra uzu, velosidade máximu hira, ninia operasionalidade, manutensaun eskalaun 1/2 hodi prevene”, dehan Falur.

Tu’ir planu karreta sira  ne’e, komandu sei distribui komandante operasaun, hodi halo servisu iha terrenu.

Jornalista : Joanito Rangel

 64 Tatal Lee,  11 Views Today