Díli-yokalaumedia.com, 19/05/2023- komandu Polísia Munisipiu Dili realiza enkontru ho komandante Esquadra sira hodi trasa planu seguransa durante realizasaun eleisaun Parlamentar 2023 ne’ebe mak sei monu iha loron 21 maiu.

Komandante PNTL Munisipiu Dili, Superintendente Xefe Polísia, Natércia Soares Martins esplika katak PNTL sei foti medida hasoru ema hirak ne’ebe kontra ordem públiku no prontu asegura eleisaun ne’e.

“PNTL hanesan instituisaun Estadu nian hodi garante lei no ordem ba ema hotu, tanba ne’e komandu Munisipiu Díli sei asegura festa demokrasia ida ne’e to’o iha publikasaun rejultadu ho seguru, lá iha violencia no perturbasun ba ita nia ema vulnerável sira, ami mos sei foti medida rigoroza hasoru sidadaun hirak ne’ebe tenta hamosu krime no perturba ordem públiku”, esplika Natércia.

Komandante ne’e mos kontinua alerta ba komunidade iha kapitál katak atu mantem nafatin hakmatek no kontribui ba paz iha Díli tanba sidadaun sira nia kontribuisaun importante tebes.

Sorumutu ne’e mos hetan partisipasaun máxima husi komandante Eskuadra sira iha kapital no estrutura iha komandu munisipiu nian.

Reportagem : Joanito Rangel.

 1,682 Tatal Lee,  2 Views Today