Díli, yokalaumedia.com (25/05/2023) – Hahu iha loron 24 fulan maiu, Komisaun Nasional Eleisaun (CNE-Sigla portugéz), halo apuramentu nasionál hodi tetu no aprova votu reklamadu sira mai husi sentru votasaun sira iha territóriu tomak.

Domingos Barreto, Vise-Presidente CNE, iha konferénsia Imprensa, haktuir katak Komisaun Nasional ba Eleisaun halo hela balansu Apuramentu Nasional no halo mos validasaun ba votu reklamadu sira.

“CNE hahu halo ona apuramentu Nasional iha loron 24 maio 2023, hodi prosede akta apuramentu munisipiu 13 no RAEOA, akta sentru votasaun hamutuk 1.472 ne’e inklui sentru votasaun 12 iha diaspora, falta akta hosi Reinu Unidu, Irlanda do Norte no Portugal, no apuramentu ne’e sei la’o durante loron tolu nia laran, ohin tama ona ba loron daruak nian”, hateten Barreto, iha kinta-Feira, 25/05, iha salaun CNE.

CNE hala’o nia funsaun no papel kompetensia haktuir ba atribuisaun iha artigu 65, alinea h, Konstituisaun Republika Demokratika Timor-Leste (KRDTL) no artigu 8, Lei Nu.5/2006, 28 Dezembru, ho redasaun alterasaun datoluk iha Lei Nu. 16/2021, 28 Jullu, Lei Nu. 6/2006, 28 Dezembru, ho alterasaun dahat ba Lei Nu.9/2017, 5 Maio, ho konjugasaun iha dekretu do Governu No.21/2017, 10 Fevereiru kona ba prosedimentu votasaun kontazen no apuramentu ba rezultadu eleisaun parlamentar.

“reklamasaun husi munisipiu Aileu hamutuk 8 ne’ebe 4 manten nulu no 4 seluk sai válidu hodi atribui ba CNRT. Husi munisipiu Ainaro votu reklamadu hamutuk 5, sai válidu hotu no atribui nafatin ba CNRT. Husi munisipiu Atauro votu reklamadu 1 sai válidu atribui ba partidu CNRT. No votu reklamadu husi Bobonaro hamutuk 43: nulu 6, branco 3 no válidu 34, iha ne’ebe atribui nafatin ba partidu PD 3, Partidu Khunto 2, Partidu FRETILIN 5 no partidu CNRT 24. Entretantu husi munisipiu Covalima votu reklamadu hamutuk 9, sai nulu 2 no validu 7 hodi atribui ba PD 1, ba FRETILIN 2 no ba CNRT 4”, aprofunda Domigos Barreto.

Aleinde ne’e, CNE simu mos keixa ida konaba sidadaun minoridade ne’ebe partisipa no vota iha eleisaun parlamentar ida ne’e, Tuir Domingos katak ne’e krime eleitoral ida tamba minoridade refere atinji idade nudar eleitor, tamba nia data moris iha fulan Agostu 2006.

“Kazu refere agora submete ona ba ministeriu publiku atu bele hao averiguasaun ba eleitor minoridade ne’e no ofisial eleitoral responsavel iha sentru votasaun, Aldeiaa Sordoliu Louba, munisipiu Bobonaro”, esplika Domingos.

Domingos tenik CNE mos simu reklamasaun sira husi sidadaun Duarte Maia inklui representante partidu CNRT, no Partidu os Verdes de Timor (PVT) nian iha sentru votasaun EP Mazop, Suku Ai-Assa, Munisipiu Bobonaro, ne’ebe kestiona kona-ba Fiskais nain rua ne’ebe uza de’it kartaun kredensial ida hodi asesu ba sentru Votasaun ikus liu rejista mos konaba kazu eleitor ida vota dala rua.

“Kazu sidadaun vota dala rua ne’e, agora dadaun iha ona ministeriu públiku nia liman hodi prosesa tuir lei ne’ebe vigora ona iha ita nia nasaun’’, hakotu Barreto.

Reportagem : Eva Ximenes

 1,214 Tatal Lee,  2 Views Today