Díli, yokalaumedia.com (28/05/2023) – Vise-Ministru Interior, Antonio Armindo hateten durante tinan ida ba kotuk Ro operasaun ne’ebe Unidade Polísia  Marítima uza hodi patrulla kuaze avaria hotu kedas, tanba ne’e Povu Japonéz, liu husi governu, sei apoia ro ba UPM.

 “Ita tau prioridade atu sosa tan ró patrullamentu foun 2 ba UPM tamba  barak mak avaria”, haktuir Antonio Armindo, Sábadu 27/05, bainhira partisipa iha aniversáriu UPM ba dala 20.

Membru governu ne’e mos haktuir tan katak nasaun Japaun sei apoio ro hat, kareta hat, kontainer hat no ekipamentu balun tan.

“Ita hatene katak ro 4, ne’ebe Japaun atu apoio mai ita nia UPM ne’e, sidauk to’o mai tanba sei iha hela prosesu aprovizionamentu, tanba ne’e sei kleur la’os hanesan ita mehi kalan aban akontese, hau espera katak tinan oin mai ne’e UPM iha ona fasilidade naton hodi hala’o servisu kontrolu iha tasi”, tenik Armindo.

Polítiku ne’e mos sujere ba komandante unidade koopera ho Autoriedade Nasionál Marítima hodi tau matan ho di’ak ba ita nia rain.

Reportagem : Eva Ximenes

 2,944 Tatal Lee,  1 Views Today