Kambódia, yokalaumedia.com (07/06/2023) – Atleta Para Powerlifting (Foti Besi) timor-oan, Silvério Soares Martins, hamorin Timor-Leste nia naran iha ASEAN Para Games ne’ebe halao ba dala 12 iha Kambódia.

Silvério rekolla medalla Osan Metan ida hafoin okupa iha 3 Lugar ho kategoria 65 kg mane ne’ebe joga iha segunda-feira (05/06/2023) foin lalais ne’e. Iha 1 Lugar okupa husi atleta ho naran Myo Min Aung husi Myanmar, 2 Lugar okupa husi atleta Khlaeo Motnok husi Tailándia, 4 lugar okupa husi Ngueyen Be Hau husi vietname no 5 lugar okupa husi Margono Margo husi Indonézia.

Atleta ne’ebe moris iha loron 05 Janeiro 1990 ne’e sente kontente ho resultadu ne’ebe nia konsegue iha Kompetisaun regionál ne’e.

“ha’u sente orgullu ho tanba bele okupa iha 3 Lugar, no ita mos bele dudu sees nasaun 5 seluk”, hateten Silvério ba yokalaumedia.com via menssenger segunda-feira (05/06/2023).

Venilale oan ne’e mos haktuir liu tan katak Timor-Leste mos akumula Medalla osan Mean ida, ne’ebe rekolla husi Atleta Para Atletizmu Teófilo, bainhira halai iha distánsia metru 1500 no sei iha oportunidade hodi halai tan iha jogu ho distánsia metru 800 no metru 400.

Informasaun klaru husi atleta no treinador Para atletizmu nia, ekipa yokalaumedia.com seidauk hetan kontaktu ruma.

Atleta Timor-Leste nian iha ASEAN Para Games ba dala 12 Kambódia hamutuk na’in 13 ne’ebe kompete iha modalidade 6 mak hanesan Para-Xadres, ne’ebe reprezenta atleta na’in 2, Para-Atletismo na’in 2, Para-Natasaun na’in 2, Para-Badminton (Tenis de meja) ema na’in 4, Para-Badminton (Tenis Lantai) ema na’in 1 no Para-Powerlifting (foti besi) ne’ebe reprezenta husi ema na’in 2.

Reportagem : Eva Ximenes

 2,702 Tatal Lee,  3 Views Today