Viqueque– yokalaumedia.com (30/06/2023) – Suku Builale nu’udar suku ida husi 10 ne’ebe kompoen Postu Administrativu Ossú iha Munisípiu Viqueque nia mahon, iha ne’ebe habitante sira maioria moris ho vida agrikultura, balun moris ho vida negósiu no oituan liu mak moris ho vida emprezariál.

Ekonómikamente sidadaun sira nia moris hahu dezenvolve an hafoin mosu oportunidade oi-oin hanesan asesu ba empregu iha rai li’ur, ne’ebe fasilita husi governu no interese rasik, inklui mos ezisténsia Credit Union Builale (CUB), nu’udar asosiasaun entre individuo sira ho objetivu atu hala’o atividade komunal ida hodi bele lori benefisiu igual ba membru sira ne’ebe ema hanaran mos kooperadu sira.

Ezisténsia CUB la deskonta mos ho kontribuisaun husi ema potensiál sira, ida mak Señora Jacinta Ximenes ho nia Kaben Marcelino Belo, ne’ebe bele dehan feto inspiradora, nunka halerik kolen, la baruk atu lori inan-aman no muda pensamentu ema nian ba hari’i organizasaun ne’e iha Builale.

Jacinta Ximenes aliás Janex ka Abua hanesan oan husi Feliciano de Sousa (Uaimori-Viqueque) no Joaninha Ximenes (Fatulia-Venilale) moris iha munisípiu viqueque, nu’udar oan dahuluk husi maun-alin  na’in 11, feto 5 no mane 6.

Feto ho idade 37 refere mak lidera Credit Union Builale ho esforsu tomak hodi fasilita komunidade sira iha aréa rurál atu rai no empresta osan ho funan ki’ik (2%) hodi sidadaun bele hakbiit sira nia ekonomia familia, hafoin konklui tiha nia estudu iha nível ensinu Superior iha Universidade da Paz (UNPAZ) ne’ebe hahu husi tinan 2007 no remata iha tinan 2011, iha fakuldade Ekonomia no Departamentu Akuntabilidade.

“Mai ita hamutuk dezenvolve ita-nia suku, sai suku ida ne’ebé mak kreátivu no inovátivu liuhusi dalan kooperativa”, husu Jacinta Ximenes.

Iha momentu ne’e kedas Abua ho maluk fundador sira seluk estabelese uluk grupu ki’ik ida ho membru na’in 21 iha 13 Novembru 2011, iha ne’ebe komesa rai osan ho kapital mensal $ 5 durante tinan 2 hafoin mak fo impresta fali ba membru sira.

Prezidente CUB ne’e haktuir katak grupu ki’ik refere ne’e transforma ba kooperativa hafoin tinan 2.

“iha loron 16 fulan febereiru tinan 2018 ami hari’ik hanesan kooperativa ho membru ne’ebe mak inklina-an iha ne’eba hamutuk 160 kompostu husi mane 84 no feto 76, dadaun ne’e benefisia ona membru nain rua ne’ebe ativa hodi fasilita servisu administrasaun ho finansas nian ho montante kada fulan ida hetan $75 no $50. Montante osan ne’ebe agora dadaun iha CBU hamutuk $1.140.103,26”, haktuir Janex.

Inan ho oan ida ne’e mos konklui estudu  primária iha eskola primária Katólika Fatulia husi tinan 1993-1999, Pre-Secundáriu iha tinan 1999-2002 iha Eskola São Cristóvão Venilale, no sekundáriu iha eskola téknika vokasionál Santa Maria Mazzarelo Venilale husi 2002-2005.

Abua hala’o nia knar diária ho mehi bo’ot ida mak hakarak nia membru hotu tenki moris di’ak, prepara kondisaun di’ak ba oan sira, atu nune’e bele dezenvolve suku no nasaun ba oin.

“dezafiu ne’ebe  durante ne’e nia hasoru mak menus rekursu humano no menus partisipasaun husi komunidade iha area refere, maibe difikuldade sira lahamate ha’u nia nia vontade hodi buka solusaun ba problema ne’ebe grupu infrenta”, afirma Jacinta Ximenes.

Credito Union Builale CUB  ne’e mós, hetan ona legalidade husi notariado  Ministerio Justica no Sekretaria Estadu Kooperativa tanba servisu maka’as husi feto servisu na’in ne’e no nia estrutura hotu inklui mos membru sira.

Reportagem : Eva Ximenes

 9,773 Tatal Lee,  3 Views Today