Dezastre Natural atinji uma populasaun 1.970 no ema 25 mak lakon vida iha 2023

Díli, Yokalaumedia.com (17/07/2023) – Informasaun ne’e publika husi Autoridade Protesaun Civil (APC) iha segunda-feira ne’e iha Kaikoli.

Xefe Gabinete Relasaun Externa, Anacleto Caetano, esplika tuir dadus ne’ebe rejista iha APC katak ema na’in 25 lakon vida no uma hamutuk 1.970 mak atinjidu husi dezastre natural ne’e akontese iha tinan ida ne’e.

“Tipu dezastre ne’ebe mak akontese iha oin Tolu, hanesan Anin Bo’ot, Ahi-Han Uma No Rai-Halai kauza ema 25 mk lakon vida no uma popolasaun hamutuk 1.970, husi númeru ne’e APC atu rehabilita mak uma 1.148, apoiu rekoperasaun mak uma 64”, hateten Xefe Gabinete Relasaun Externa no komunikasaun, Anacleto Caetano, iha APC Kaikoli, Segunda-Feira, (17/07/2023).

Caetano esplika katak uma hirak ne’ebe mak Autoriedade atu halo rehabilitasaun hamutuk kategoriza ba tipu estragu tolu mak hanesan kategoria a’at total hamutuk 413, kategoria a’at naton 199 no a’at kaman 536.

Apoiu rekuperasaun ne’ebe mak Autoriedade Protesaun Civil (APC) atribui ne’e bazeia ba dekreto lei nú. 7/2021 artigo 9⁰.

Munisípiu sira ne’ebe afeta liu ba dezastre natural ne’e mak Ainaro, Baucau, Bobonaro, Ermera, Lautem, Manufahi, Viqueque no RAEOA.

Autoridade protesaun civil nafatin  alerta ba komunidade sira ne’ebé hela iha fatin risku ba dezastre tenki halo protesaun ba nia vida no ba sasan sira iha uma laran.

Reportagem : Mario Ximenes (Kontributór) & Eva Ximenes (Revizora)

 1,916 Tatal Lee,  2 Views Today