Díli, yokalaumedia.com (18/07/2023)- Polisia Nasional Timor-Leste (PNTL) Liu husi servisu Investigasaun Kriminal ho komando munisipiu Liquica kaptura sidadaun nain 3, priende motorizada 2 ho kilat manu 21 iha munisipiu Liquiça iha loron segunda-feira semana ne’e.

Porta Voz PNTL, Superintendente António da Luz, konta katak iha loron 17 jullu 2023 sidadaun na’in 3 ho inisial GMP,AAPM ho MB hatama sasan ilegal hanesan motorizada 2 ho kilat manu ho marka Sar Tiger lolon 21  iha oras tuku 11:41 kalan.

“Sira nain 3 lori sasan Ilegal hanesan kilat manu 21 ho marka Sar Tiger”, hateten Superintendente Polisia, Antonio da Luz, iha komando Jeral, Kaikoli, Tersa-Feira, (18/07).

Sidadaun na’in 3 ho evidénsia hirak ne’e polísia kaptura hafoin simu informasaun husi Komandante Polísia Munisipiu katak iha Kaimeo suku Dato, munisipiu Liquica nian, membru Servisu Inteligénsia Polisial prende ema na’in 3 ho motorizada 2 no kilat manu lolon 21 bainhira ekipa halo hela patrulhamentu iha area Maumeta.

 “Agora dadaun investigasaun munisipiu Liquica halo ona prosesu identifikasaun no sei submete Ministeriu Publiku”, sublina Antonio.

Nia afirma tan katak tuir informasaun sasan ilegal sira ne’e tama husi fronteira.

“oras ne’e sei iha hela prosesu investigasaun tan ne’e ami seidauk bele fahe informasaun detallada, no ita sei akompanha ho prosesu investigasaun mak bele hatene kle’an liu”, relata Superintendente Polisia.

Reportajem: Eva Ximenes.

 1,486 Tatal Lee,  2 Views Today