Díli, yokalaumedia.com (02/08/2023) – Xefe suku balun iha kapital Díli husu Polisia Nasional Timor-Leste (PNTL) munisipiu atu reativa  fali servisu Konsellu Polisiamentu Komunitariu (KPK) atu tulun autoridade seguransa  minimiza númeru konflitu.

Xefe Suku Madohi, Bernardino de Cristo Ferreira, husu Komandu PNTL Díli hamosu fali servisu KPK tanba nia servisu bele ajuda ona  PNTL atu minimiza problema iha suku.

“Liu husi enkotru Konsellu Seguransa Munisipál (KSM)  ami haree  oinsá mak bele reativa KPK hodi bele ajuda polísia nune’e  bele halo prevensaun ba konflitus  ne’ebé akontese iha Munisipiu Díli tanba ita nia esperansa mak ne’e, hanesan opsaun ida ba nasaun oinsá mak sai instrumentu hodi alkansa estabilidade no pás ba sá ita hanesan  nasaun foun, tanba ne’e  presiza deskuti hodi reativa no dezenvolve fali KPK”, dehan Bernardino.

Autoriedade lokal ne’e mos konta katak iha Suku Madohi uluk  KPK  halo nia servisu di’ak,  tanba hatudu progresu kolaborasaun diak  ho Xefe suku ho membru Konsellu Suku  no Ofisiál Polísia Suku(OPS) bainhira mosu problema.

 “Maske iha suku Madohi ne’e iha área balun sai risku ba  konflitu, maibé durante KPK hatudu servisu di’ak tanbá kolabora tebes ha’u hanesan autoridade lokál no Konsellu Suku ba rezolve problema”, konta Xefe Suku.

Xefe Suku Kaikoli, Hipolito Marques, mos, konkorda no hateten suku kaikoli mak nudar suku dahuluk  ne’ebé estabelese Konsellu Polísiamentu Komunitariu (KPK),  iha  periodu pandemia Covid-19, maibe 2020 KPK labele halo nia funsaun fali.

“Durante ne’e estabesimentu KPK iha suku kaikoli,  bele dehan lao di’ak tanba sira tulun  tebes  ha’u nia servisu kuandu iha konflitu no problema iha bairru sira KPK mak tún hodi identifika kauza husi problema hodi ami hamutuk hodi rezolve, maibe iha tinan 2020 la funsiona servisu tanba iha promesa politika mak la realize”, dehan nia.

Hatan mahusuk ne’e,  Komandante PNTL Munisipiu Díli Superientendente Xefe Orlando Pereira Gomes, aseita no hateten komandu PNTL Munisipiu Díli  sei deskuti kle’an ho autoridade Munisipiu Dílí no Autoridade  kompetente sira seluk molok deside hodi reativa fali servisu KPK.

 “Ita tenke deskti halo didi’ak,  molok ha’u aprezenta ba Komandante Jerál PNTL liga ba servisu KPK nian, tanba ne’e ha’u nia mandatu ha’u konvoka fali reuniaun Konsellu Seguransa Munisipál atu hamutuk haree no deskuti didi’ak asuntu ne’e”, hatan Orlando Gomes.

Komandante ne’e  promete, sei propoin ba institusaun relavante  atu hamosu dekretu lei hodi  regula servisu KPK no sei koopera ho parseria sira hodi fó fali treinamentu ba KPK.

Prezidente Autoridade Munisipiu (PAM) Díli, Guilhermina Filomena Saldanha Ribeiro, hateten  prosesu reativa servisu KPK presiza ema hotu nia tulun, Xefe suku sira to’o  Governu,  atu bele organiza  di’ak servisu KPK.

“Ida ne’e laos Autoridade Munisipiu Díli nia kompetensia deít, maibe  ita hotu  nian, autoridade seguransa no autoridade lokál inklui Governu atu bele organiza  di’ak servisu KPK”, esklarese Guilhermina.

Prezidente Autoriedade ne’e mos hakle’an liu tan katak Governu prevé ona osan $200 ba kada Suku hodi rezolve no haree konaba servisu KPK nian.

Reportagem : Eva Ximenes

 2,655 Tatal Lee,  2 Views Today