Díli, yokalaumedia.com (08/08/2023) – Ministra Edukasaun, Dulce de Jesus Soares, husu Prezidente foun Instituisaun Nasional ba Formasaun Dosentes no Profisional Edukasaun (INFORDEPE) atu adapta sistema digital iha formasaun dosente sira.

Pedidu ne’e halo bainhira fo posse ba prezidente foun INFORDEPE, Domingos Martins, hodi subtitui Manuel Gomes, ne’ebe sei lidera instituisaun ne’e durante tinan 4.

“Ohin hau koko atu dezafia INFORDEPE atu hadia sistema formasaun tamba ita hakarak ga lakohi ministeriu edukasaun atu hakat ba sistema dizitalizasaun ba futuru formasaun bele liu husi plataforma online”, hateten Ministra Edukasaun Dulce de Jesus Soares, iha salaun IMFORDEPE, iha segunda-feira, (07/08).

Membru IX hovernu ne’e mos konsidera formasaun online ne’e bele evita abondona estudante iha eskola sira.

“Ita agora tenki utiliza plataforma dizital atu nune’e labele abandonado estudante iha sala de aula tanba ne’e ba futuru ministeriu edukasaun liu husi INFORDEPE sei halo kooperasun ho nasaun seluk hanesan Brasil atu fasilita formasaun ba professores hotu liu husi Online”, hateten Dulce,

Dulcia de Jesus Soares mos rekonhese velosidade liña internet iha Timor-Leste mos fatór ida ne’ebe difikulta mos formasaun online ba professor, tantu munisípiu hanesan mos iha nasionál.

“Hau hanoin kona ba rede internet ne’ebe lento iha munisipiu ne’e inklui mos kapital sempre lento, laos sai fali obstakulu ba ita nia prosesu formasaun husi plataforma online”, rekoñese  Ministra.

Domingos Martins, Prezidente INFORDEPE emposadu, kompromete atu implementa no kontinnua fasilita formasaun ba professor sira hotu.

“Hanesan ohin ministra hatete ona hanesan hafanu ona ami, oinsa ba futuru koopera hamutuk ho ajensia nasional ho internasional sira ne’ebe prontu atu apoiu ami no ba futuru sei hadia liu tan sistema komunikasaun online diak liu tan”, Domingos promete.

Reportagem : Eva Ximenes

 1,427 Tatal Lee,  1 Views Today