SEI vizita grupu Soru Tais iha Díli

Díli, yokalaumedia.com (14/08/2023)- Sekretariu Estadu ba Igialdade (SEI), Elvina Sousa Carvalho vizita Rede Soru Na’in hodi kongratula sira tan estabelese ona loja hodi tau produtu kultural hotu-hotu husi 13 munisípiu inklui Rejiaun Administrativa Espesiál Oecusse Ambeno (RAEOA).

 “Hau kongratula ba Rede soru Na’in hotu ne’ebe iha kreatividade hodi soru tais no iha ona sira nia loja hodi tau hamutuk sira nia produtu hotu husi 13 munisípiu inklui RAEOA”, hateten Elvina Sousa Carvalho, iha Pateo, Segunda-feira (14/08).

Elvina husu ba membru Soru Na’in hotu atu nafatin halibur hamutuk hodi dezenvolve sira nia produtu ne’ebe ho kualidade liu husi Soru Tais.

“hau nafatin husu ba membru ou Grupu Soru Na’in hotu-hotu nafatin halibur hamutuk hodi dezenvolve ita nia produtu ne’ebe ho kualidade hodi rezerva ba ita nia Tais no mos Tais reprezenta ita nia kultura”, tenek SEI.

Membru governu ne’e sente kontente tan grupu ne’e mos envolve labarik feto ne’ebe iha rasik produtu husi sira nia mão-de-obra.

“iha membru Suru Na’in ne’e nia laran inklui mos labarik nain rua ne’ebe mak iha ona sira nia produtu, hau hanoin iha futuru ne’ebe diak ona”, sublina SEI.

Kriasaun loja Soru Na’in ne’e hetan apoiu husi parseria dezenvolvimentu sira hanesan UN WOMAN no ALOLA FUNDATION.

Reportagem : Eva Ximenes

 373 Tatal Lee,  3 Views Today