Díli, yokalaumedia.com (16/08/2023)- Sekretariu Estadu Komunikasaun Sosial (SECOMS), Expedito Dias Ximenes, hasoru malu ho Prezidente Parlamentu Nasional, Maria Fernanda Lay, hodi ko’alia kona nomeiasaun ba membru Konsellu Imprensa foun ne’ebe reprezenta Parlamentu Nasionál hodi substitui atuál SEKOMS.

“Ohin hau mai husu ba Prezidente Parlamentu Nasional husu atu aselera substutuisaun ha’u nian hanesan membru konsellu imprensa hodi kompleta membru iha konsellu imprensa”, hateten SECOMS, Expedito Dias Ximenes, hafoin enkontru, iha parlamentu Nasional, Kuarta-Feira (16/08).

SECOMS haktuir katak Konsellu Imprensa iha membru nain 5 nain 2 husi organizasaun jornalista ne’ebe hili husi eleisaun, nain 1 husi orgaun komunikasaun sosial hanesan media nain sira no nain 2 husi Parlamentu Nasional.

“Nain 2 husi parlamentu Nasional ne’e na’in ida husi péritu ba média mak hau rasik no ida seluk péritu iha Legal, no momentu ne’eba parlamentu Nasional hili ha’u hodi reprezenta órgaun lejislativa ne’e iha konsellu imprensa no agora hau hetan knar seluk ona, presisa substituisaun ba restu mandatu”, subliña Expedito.

Expedito afirma katak mandatu ba konsellu imprensa sei to’o iha tinan 2025, sei iha tinan ida ho balun presisa substituisaun husi parlamentu Nasional tamba lei komunikasaun sosial no mos statutu konsellu imprensa nian katak presija membru Konsellu Imprensa tenki na’in 5 kompletu mak bele foti dezisaun ruma iha plenária.

Nia mos esplika katak membru konsellu imprensa agora nain 4 deit presisa substituisaun ida lais hodi nune’e sira bele foti desizaun oinsa atu planu ba orsamentu 2024 no desizaun plenaria atu kontratu funsionariu sira no kontratu regulamentu ba iha konsellu imprensa nian no desizaun atu hili diretor ezekutivu.

“Deliberasaun sira hanesan ha’u temi ne’e presisa ema nain 5 kompletu, no ha’u mos sujere ba Prezidente Parlamentu Nasionál atu substitui fali membru konsellu imprensa sebele hili fali feto ida tamba durante mandatu ba dala rua nian ne’e mesak mane hotu deit”, Sujere Expedito.

Ex-membru KI ne’e mos informa katak Prezidente Parlamentu Nasional hateten katak informa ona ba bankada sira hotu no xefe bankada hotu atu prepara daudaun kandidatu depois de orsamentu ratifikativu 2023 ne’e parlamentu Nasional sei nomeia membru foun konsellu imprensa nian.

Reportagem : Eva Ximenes.

 1,765 Tatal Lee,  3 Views Today