Díli, yokalaumedia.com (31/08/2023) – Primeiru-Ministru, Kay Rala Xanana Gusmao sei partisipa simeira Association of Southeast Asian Nations (ASEAN) ba dala-43 iha Jakarta Indonezia iha semana ida ne’e nia laran, hahu husi loron 05 to’o loron 07 setembru tinan 2023.

Asuntu ne’e hato’o husi Kay Rala Xanana Gusmão hafoin hasoru malu ho Prezidente Repúblika iha bairro-Pité Díli, iha kinta-feira (31/08) ne’e.

“Ohin ha’u mai informa ba Prezidente Republika Ramos Horta katak Prezidente Republika Indonezia Joko Widodo haruka konvite ida mai ha’u  atu ba partisipa semeira ASEAN iha Jakarta Indonezia”, hateten PM Kay Rala Xanana Gusmão.

Xanana partisipa iha semeira ASEAN ne’e hanesan observador maibe sidauk tama ba full membre.

“Ba nudar xefe do Governu, sei hasoru ho ema bo’ot-bo’ot iha ne’eba, ba rona, ba aprende, tamba ita la’os full membre no ita tama tiha ona ha’u bele koalia ASEAN nune’e-nune’e maibe tenki prepara ita nia-an, prepara ema sira tinan 2025 bele sai full membre ona”, haktuir PM, Kay Rala Xanana Gusmao.

Tuir Xanana Gusmão katak Expulso ne’ebe Junta Militar halo ba Diplomata timor-oan iha Myanmar sei la fo impaktu negativu ba Timor-Leste nia adezaun ba ASEAN.

“la fo impaktu tanba Myanmar la’os ASEAN, maibe Myanmar parte ida husi ASEAN”, afirma Xanana.

Líder rezistente ne’e mos konfiante katak Timor-Leste sei sai Membru Plenu ba ASEAN tanba iha prestijiu di’ak, em termus de envolvimentu iha organizasaun mundial sira.

Xanana ezemplifika katak Timor-Leste hanesan Fundador g7+, no hanesan mos observador permanente iha ONU tanba ne’e bele sai membru permanente ASEAN.

Reportagem : Eva Ximenes

 2,532 Tatal Lee,  2 Views Today