Díli, yokalaumedia.com (01/09/2023) – Konsellu Imprensa Timor-Leste (CI-TL) realiza konferensia Internasional “The Dili Dialogue Forum” hodi promove no haforsa Liberdade Imprensa iha Sudeste Asiatiku nu’udar impurrador ba Tipu Direitu Umanu hotu.

Prezidente Konsellu Imprensa Timor-Leste, Otelio Ote, hateten the Dili Dialogue Forum (DDF) nu’udar atividade ne’ebe deklaradu husi membru konsellu Imprensa iha nasaun sudeste Asiatiku no pasifiku, durante konferensia internasional iha Dili bainhira selebra aniversariu konsellu imprensa dahuluk iha loron 07 to’o 10 fulan Maio tinan 2017.

 “the Dili Dialogue Forum sai hanesan aktividade anuál ba konsellu imprensa hodi deskute konaba liberdade imprensa no liberdade espresaun, debate konaba pozisaun no kondisaun papel konsellu imprensa iha Sudestiku Asiatiku inklui Myanmar no pasifiku hodi kontribui sai impurrador ba direitu Umano no mos fo espasu ba sosiedade sira iha liberdade imprensa ho liberdade espresaun no fo espasu ba profisaun jornalista ne’ebe nakonu ho etika”, esplika Ote.

Prezidente KI mos informa katak iha tinan 2022 pozisaun liberdade imprensa TL okupa iha numeru 17 maibe tinan 2023 hakat liu ba pozisaun 10 iha liberdade mundial, signifika rezultadu pozitivu. Ne’ebe refleta husi fundador nasaun sira no lejislador sira ho komprimisiu ne’ebe hatur iha artigu 40 ho 41 konstituisaun Republika Demokratiku Timor-Leste.

Otelio haktuir katak dezenvolvimentu media durante ne’e la’o buras tebes no tuir dadus katak konsellu imprensa regista ona media imprime 7, Radiu komunidade inklui privadu 29, Televizaun 5 no plataforma online 17. Enkuantu jornalista ne’ebe hetan ona karteira professional hamutuk 321.

Prezidente KI informa katak konsellu imprensa hanesan orgaun regulador iha planu estratejiku tinan 2021 to’o tinan 2026 hatur iha komprimisiu balun atu kontinua tau matan no kapasidade tekniku professional intelektual no jornalista sira atu servisu hamutuk ho parseiru dezenvolvimentu tantu nasional no internasional sira mak hanesan UNESCO, UNDP no ABC Internasional Development.

Iha fatin hanesan Sekretariu Estadu Komunikasaun Sosial (SECOMS), Expedito Loro Dias Ximenes hato’o felisitasaun ba KI tamba bele organiza dala ida tan ba eventu The Dili Dialogue Forum, eventu ne’ebe realiza kada tinan hanesan forum diskusaun iha ASEAN nia laran.

“Ha’u hakarak kongratula KI tamba hili tema ne’ebe di’ak, tamba iha sosiedade atual Direitus Umano hotu tenki sai prioridade, Timor-Leste dezde Independensia to’o agora asume nafatin akordu Internasional hotu-hotu ne’ebe jere direitu umano, tamba Timor-Leste inisiu ho di’ak oinsa hola situasaun ida ne’ebe hola violasaun husi direitus umano sira nian”, sublina Expedito.

Sekretáriu Estadu ne’e mos apresia ho servisu KI nian tan bele envolve nasaun Sudeste aziátiku no pasífiku sira hodi ko’ali konaba Liberdade expresaun no Liberdare imprensa no mos direitu Umanu.

“maski Timor-Leste sidauk hola parte iha ASEAN, maibe dezde tinan 2017 to’o agora konsellu Imprensa sempre iha preukupasaun atu involve nasaun dezenvolvidu sira iha sudeste aziátiku hodi trata Direitu Umanu no Liberdader Imprensa no Liberdade Expresaun no mos deskute konaba regulamentu media iha ASEAN”, apresia Expedito Ximenes.

Hanesan reprezentante IX Governu ba area komunikasaun sosial hato’o mos nia sentimentu kontente tan DDF ne’e bele haforsa media liu-liu liberdade imprensa ne’ebe hakarak haklean hodi servi sosiedade no mos liberdade imprensa bele promove direitu umano hotu.

Reportagem : Mário Cruz (kontributór) & Cedelizio Rego (Revizór)

 2,572 Tatal Lee,  3 Views Today