Díli, yokalaumedia.com (08/09/2023) – Ministru Administrasaun Estatál (MAE), Tomás do Rosário Cabral, enkontru kortezia ho Governador Provínsia Hunan-China, Mao Weiming, hodi hametin liu tan kooperasaun entre Timor-Leste ho Governu Provínsia Hunan.

Tomás do Rosário Cabral, Ministru Administrasaun Estatal, hateten kooperasaun ne’e sei foka liu ba área Agrikultura, no reativa hikas atividade ne’ebe paradu kleur ona, ne’ebé antes ne’e implementa iha Munisípiu Manatuto, tanba Hunan-China hanesan Provínsia produtor harre.

“Ha’u hanoin ho Hunan ne’ebé iha tiha ona kooperasaun kle’ur, se bele ita hahú hala’o fila fali atividades Agrikultura ne’e ho apoiu sira seluk. Uluk Ami ba iha Hunan, dehan atu haruka mós Timor-oan sira atu ba eskola iha ne’ebá, tanba ne’e, se bele akordu ne’e tenke hahú reativa fila fali”, MAE afirma.

Tuir komunikadu imprensa ne’ebe publika iha FB loron sexta-feira (08/09) husi média GMAE katak Goverador Provínsia Hunan-China, Mao Weiming, sente onradu tebes tan bele hasoru malu ho Ministru Administrasaun Estatál, hodi ko’alia kona-ba kooperasaun ne’ebé halo ona.

“ha’u hakarak fo énfaze katak, nasaun rua ne’e ninia kooperasaun liu-liu ema ho ema (people to people diplomacy), no mós iha setór seluk ne’ebé mak ita bele dezenvolve liután, para bele dada nasaun rua ne’e hamutuk, liu-liu Manatutu ho Hunan”, Goverador Provínsia Hunan ne’e hateten.

Entretantu, aban MAE ho Governador Provínsia Hunan no Delegasaun, sei dezloka ba Munisípiu Manatutu, hodi lansa fila-fali Kooperasaun ne’e.

Reportagem : Eva Ximenes

 3,811 Tatal Lee,  2 Views Today