Díli, yokalaumedia.com (10/09/2023) – Movimentu Letras, movimentu ida ne’ebe halibur estudante no unisversitáriu  sira hodi habo’ot neon liu husi konversa, diskusaun, leitura no hakerek artigu sira, organiza Semináriu Nasionál ida ho tema “Koñesimentu no Poder” hodi komemora loron mundiál ba literasia, iha fundasaun Haburas, Faról, domingo (10/09).

Movimentu Letras nu’udar komunidade literária ne’ebé iha objetivu atu promove literasia ka abilidade leitura no hakerek iha sosiedade Timor-Leste.

Constantino de Jesus, Jestór Movimentu Letras, esplika katak realizasaun semináriu refere atu, partikularmente, eleva komunidade akadémiku nia kapasidade krítiku hodi hatene analiza fenómenu sosiál sira ne’ebe akontese iha Timor-Leste.

“Loron 08 fulan setembru, nu’udar loron mundiál ba literasia. Mundu sempre komemora hodi subliña katak literasia ne’e importante ba ita-nia moris. Tinan ida-ne’e, UNESCO hasai tema jerál ba loron literasia mundiál mak “Promove Literasia ba Mundu Eíntranzisaun: Luta ba Sosiedade Sustentável no Páz” esplika Constantino.

Constantino mos sublina katak atividade ne’ebe realiza ne’e mos nu’udar Movimentu Letras nia programa estratéjiku atu halo kampaña no sensibilizasaun  literasia iha Timor.

“Nune’e, ohin ami realiza semináriu ne’e ho tema jerál Koñesimentu no Poder. Tema ida-ne’e atu lori ita ba kompriende oinsá poder funsiona no domina ema iha sosiedade”, subliña Constantino.

Oradór sira ne’ebé fahe hanoin hamutuk ho estudante no universtáriu sira iha komemorasaun loron Mundial Literasia ne’e mak Everd Daniel, Dosente Relasaun Internasionál-UNDIL, ne’ebe aborda kona-ba “Testu no Poder tuir Jaques Derrida” no Alessandro Rocha Bicca, Dosente Filozofia-UNTL, ne’ebe ko’alia kona-ba “Koñesimentu-Poder tuir Michael Foucault“.

Reportagem: Joanito Rangel.

 9,469 Tatal Lee,  2 Views Today