Díli, yokalaumedia.com (14/09/2023) – Timor-Leste hanesan nasaun foun ne’ebe restaura nia independénsia iha tinan 21 ba kotuk, 20 maio 2002. Governu kada tinan 5 troka malu, exporta traballador anualmente hodi ba servisu iha tasi balu hanesan Korreia do Sul, Austrália no barak mos ho inisiativa rasik hodi buka dalan ba moris iha Europa, Inglaterra inklui mos rai sira seluk.

Promesa polítika husi polítiku sira, iha tempu kampaña ba buka votu iha povu nia tatis, sei fresku hela iha Timor-oan ua’in nia memória no neon katak atu kria kampu traballu bainhira sai makaer fukun rai Timor nian, maibe realidade hatudu katak promesa sira hela ho lia mamuk de’it no jovem timor-oan tenki nadodon ba rai li’ur no husik ferik no katuas bali rai ida ne’e, ba buka osan iha rai seluk.

Ohin, loron 14 setembru 2023, Governu liu husi SEFOPE loke tan dalan ida, rai ida hanesan Japaun hodi exporta nia emar (jovem) 13 atu buka dolar hodi tulun hikas nia família espesifikamente no nia nasaun.

Iha despedida, Sekretariu Estadu formasaun Profesional no Empregu (SEFOPE), Rogério Mendonça, agradese ba kompania japoneza ne’ebe mak koopera ona ho Governu atu simu trabalador timor-oan nain 14 maibe ida mak kansela tiha hela nain 13 mak hodi ba servisu iha Japaun.

“ohin ita sente orgullu tebes-tebes tamba iha nasaun Australia, Korea bele simu ona trabaladores maibe durante ne’e husi Nasaun Japaun mak sidauk no ohin foin primeira vez hodi simu ita nia trabalador, maske kooperasaun entre rai rua ne’e hahu husi governu anterior kedas foin mak realiza”, afirma Rogério.

Membru Governu ne’e mos kontinua husu ba foin-sa’e traballador hirak atu aproveita di’ak oportunidade ne’ebe mak iha hodi servisu ho disiplina atu fo nafatin biban ba timor oan seluk bele tuir.

 “husu ba ita bo’ot sira ne’ebe hetan oportunidade no ita bo’ot sira mak sai hanesan save ne’ebe tenki hatudu ita bo’ot sira nia komportamentu di’ak servisu ho disiplinadu no kultura japaun ba oras ne’e importante tebes, respeitu ema seluk nia kultura hatudu ita bo’ot sira nia progresu iha servisu, se ita bo’ot nain 7 ne’e mak hetan oportunidade ne’e ho komportamentu diak sei fo espasu ba timor-oan ne’ebe mak atu ba, no imi nain 7 ne’ebe mak bairua atu destaka ba mak hatudu komportamentu ladiak signifika sei taka dalan ba timor-oan hotu”, husu Rogério.

Ex-Primeiru-Ministru, Taur Matan Ruak, ne’ebe hola parte mos iha despedida ne’e, husu traballador timor oan hirak ne’e atu servisu tuir kultura japoneza, ne’ebe disiplinadu liu.

“ohin loron Timor-Leste marka istoria foun ida tamba primeira vez timor oan atu ba servisu iha nasaun Japaun, la fasil liu husi prosesu tina naruk nia laran ohin bele realiza duni. rai Japaun hanesan nasaun ne’ebe disiplinadu lo’os no sira iha moto ida katak “moris para halo servisu”. Maibe timor nian Servisu atu buka moris, ne’e buat rua ne’ebe la hanesan, tamba ne’e mak ita nian kuandu osan iha ona ita ba tur gasta hotu lai mak servisu fali, loron manas ita bolu malu ba tur tiha iha malirin, mahon no ida ne’ebe lakohi sai husi loron manas ita dehan hanesan ne’e aban bainrua o mate lori ho osan ba lalehan ka?, husik tiha ida ne’e”, haktuir Taur ho hamnasa, liu husi nia diskursu, iha salaun SEFOPE, Kaikoli, kuinta-feira, (14/09)..

Taur Matan Ruak mos husu ba trabalador sira atu respeitu hirarkia, hatudu dezempeñu ne’ebe di’ak no mantém pontualidade ba servisu.

Ines Mendonça, Trabaladora, sente kontente no orgulu tamba bele hetan oportunidade ida ne’e hodi ba servisu iha Japaun.

“ha’u sente orgulu no kontente tebes tamba bele hetan ona oportunidade ida ne’e tamba liu husi prosesu ne’ebe mak naruk ohin bele finaliza duni ha’u nia mehi ne’e”, Haktuir Ines ho kontente.

Tuir informasaun husi SEFOPE katak Trabalador sira ne’e sei ba servisu iha Japaun hamutuk 13, na’in 7 mak sei aranka iha loron 16 novembru tinan ne’e no na’in 6 seluk sei ba iha segundu etapa.

Reportagem : Eva Ximenes & Joanito Rangel

 1,796 Tatal Lee,  2 Views Today