Díli, yokalaumedia.com (25/09/2023) – Ministeriu Interior realiza enkontru jeral ho PNTL, Protesaun Sivil, inklui diresaun sira iha Ministeriu atu reforsa seguransa hodi  nune’e bele fo biban ba dezenvolvimentu nasional.

Ministru Interior (MI), Francisco Guterres, iha sorumutu ne’e, órgaun sira ne’e servisu iha área seguransa, ne’ebe nu’udar fatór importante tanba ne’e tenki fo apoiu tomak ba dezenvolvimentu nasional.

“Bainhira iha rai ida hakarak dezenvolve nia-an maka ita tenki iha seguransa ida metin, hodi bele fo konfiansa ba ema rai seluk hodi mai investe iha ita nia nasaun mos la tauk tamba ema la estragu, ho nune’e  ema bele la’o loron kalan diak bele ba faan nia sasan, ida ne’e mak ita atu konsolida”, informa MI, Francisco Guteres, hafoin enkontru, iha Segunda-Feira, (25/09) ne’e.

Governante ne’e mos afirma importánsia husi Servisu sira ne’ebe instituisaun hirak ne’ebe tutela ba Ministériu Interior presta mak manten estabilidade no hakmatek.

“Imi sira ne’e idak-idak iha ninia papél ida atu bele dezenpeña iha konstrusaun estadu ida ne’e atu bele dezenpeña dezenvolvimentu nasional ida ne’e mak saida! se ita bo’ot komandante munisípiu saida mak sei halo ba rai ida ne’e no fatin servisu nian ne’e hakmatek, se ita bo’ot komandante siguransa Protesaun sivíl ida saida mak sei halo no ita bo’ot membru siguransa polisia ba suku nian saida mak sei halo”, sublina Ffrancisco.

Durante sorumutu jerál ne’e mos Instituisaun sira mak hanesan Protesaun Sivil ne’ebe lidera husi Sekretaria Estadu, Polísia Nasionál Timor-Leste, ne’ebe lidera husi Komando Jerál no Diretor sira inklui mos xefe Departamentu sira iha Ministériu Interior define planu estratéjiku ida ne’ebe bele sai hanesan matadalan ba tinan lima mai, relativamente ho ida-idak ninia papel hodi dezenvolve nasaun ida ne’e hodi hetan paz no hakmatek.

Reportagem : Eva Ximenes

 3,922 Tatal Lee,  2 Views Today