Díli, yokalaumedia.com (28/09/2023) – Manny Pacquiao, Boxista lejendariu ne’ebe konesidu iha Mundo ho naran Pacman to’o ona iha Timor-Leste iha kinta-feira  (28/09) ne’e ho aviaun Citilink iha Airoportu Internasional Nicolau Lobato iha oras 12:06.

Filipinu ne’e tun husi Aviaun Citilink no simu direita husi komisaun organizador husi MJDAC hamutuk ho parte seguransa husi PNTL, entidade sira husi governu, Prezidente CDTL Macário F. Sanches no Kay Olo, ne’ebe tara tais ba boxista lejendariu tuir kultura Timor-Leste.

Hafoin tara tais ba boxista Manny Pacquiao ho nia delegasaun sira direitamente tama ba fatin VIP Airoportu Internasional Nicolau Lobato nian, komisaun organizador husi MJDAC nian labele fo oportunidade ba média sira atu asesu ba fatin refere, hafoin liu minutu 15 Manny Pacquião sai husi fatin refere no mai direitamente fatin deskansa nian iha Timor Plaza.

Tuir oráriu katak Manny Pacquiao orsida iha parte loraik vizita nia maluk sira husi Filipina iha Timor-Leste liuliu embaixada Filipina iha Timor-Leste, no Aban loron daruak nian Manny Pacquião sei ba hasoru Prezidente da Repúblika Jose Manuel Ramos Horta iha palasaiu prezidente iha oras 08:30 dader, hafoin hasoru tiha presidente República hakat Liu kedas ba  hasoru Primeiru Ministru Jose Alexandre Kayrala Xanana Gusmão iha palasaiu governu iha oras 09:00 dader  no iha loraik boxista profisionál ne’e sei halo mos vizita ba klube boxing sira iha Timor-Leste, hanesan klube Benfica Boxing Club, EL Matador Boxing Club, Oriental Boxing Club no ikus ba Dili boxing Club, Iha Dili Boxing Club nia fatin mak atleta sira husi klube hirak ne’e sei halo jogu ezibisaun no iha  parte kalan mak MJDAC sei oferese jantar ho Manny Pacquião ho nia delegasaun mai Timor-Leste.

Ne’e Iha loron 30 fulan setembru 2023 boxista lejendariu ne’e sei visita ikus Liu ba iha ministru juventude desportu arte kultura-MJDAC, Nelyo Isaac Sarmento, iha salaun MJDAC nian iha oras 08:30 hafoin boxista nee fila hikas ba nia pais filipina.

Orsamentu ne’ebe mak prepara ba vizita boxista lejendariu Manny hamutuk dolár amerikanu rihun 26

Reportagem : Rhiano Martins (Kontributor) & Eva Ximenes (revizora)

 3,467 Tatal Lee,  2 Views Today