Viqueque-Builale, yokalaumedia.com (02/10/2023) –Sekretáriu Estadu Peskas, Domingos da Conceição dos Santos “𝐌𝐚𝐮-𝐜𝐚𝐫𝐨”, Kinta-feira foin lalais ne’e, hala’o vizita traballu ida ba suku Builale iha Postu Ossú no Munisipiu Viqueque, espesialmente ba CUB hanesan kooperativa ida ne’ebe eziste iha Suku rural ne’e atu bele haree direta komunidade, membru CUB nia atividade ligadu ba hakiak ikan no agrikultura.

Sekretáriu Estadu Peska apresia ho Credit Union Builale (CUB) nia progresu ne’ebé iha dezde ezistensia nu’udar grupu komunitária ida.

“ha’u hakarak hatete ne’e luar biasa, la’os buat halimar, tanba ha’u harii kooperativa rua ka tolu, mas osan seidauk to’o dólar rihun atus. Suku ida ne’e iha foho lolon, maibé lideransa feto ida ne’e bele halo buat foun ne’ebé sai ezemplu ba ema seluk, tanba ha’u vizita fatin barak ona maibe foin hetan referensia ida hanesan ne’e”, hateten, SEP, Domingos da Conceição dos Santos, CUB, Builale, kuinta-feira (28/09).

Membru IX governu ne’e mos promete atu apoia no fasilita membru husi CUB atu hetan formasaun iha Instituto Nacional de Pescas e Agricultura (INPA) atu aumenta koñesementu liu husi formasaun iha área agrikultura nian.

“ha’u aprova ita bo’ot sira nia proposta atu bele haruka ema na’in 2 ba tuir formasaun iha sentru formasaun ho naran INPA iha munisipiu Liquiça”, haktuir Domingos.

Ex-Prezidente Autoriedade Munisipiu Liquiça ne’e mos afirma liu tan katak formasaun ne’e bele tulun liu tan kooperativa nune’e hakiak ikan ho sistema modernu hodi bele mós hasa’e produsaun ikan iha suku ne’e.

Reportagem : Mário da Cruz.

 6,386 Tatal Lee,  4 Views Today