Díli, yokalaumedia.com (04/10/2023), – Ministru Defeza (MD), Contra-Almirante  Donaciano da Costa Gomes, vizita Institutu Defeza Nasionál (IDN) hodi sorumutu ho formandu sira iha Kursu ba Promosaun Kapitaun ba da-ualu husi Falintil – Forsa Defeza Timor Leste (F-FDTL) hamutuk na’in 53, ne’ebe halo mos vizita komparativu ba Instutu refere. Iha sorin seluk, Governante ne’e mos kontinua buka hatene programa no ambiénte servisu IDN nian nu’udar institutu formasaun iha área defeza, ne’ebe lokaliza iha Palásiu Governu Díli.

Ex-Xefe Estado Maior Forsa Armada ne’e apresia no konsidera  katak vizita ida ne’e importante.

“Hau desidi mai hasoru ita bo’ot sira, tanba Primeiru- Ministru Kay Rala Xanana Gusmão hateten ba há’u, dehan futuru líder oficias ne’ebe di’ak ba rai ne’e mak hahu husi ita bo’ot sira”, dehan Ministru Defeza, haktuir husi komunikadu Imprensa ne’ebe publika husi Média-GMD (02/10).

Pedro Klamar Fuik husu ba formandu na’in 53 ne’e, hanesan militar, atu komporta di’ak liu tan iha sosiedade,  bainhira hala’o hala’o kna’ar estadu no misaun, tanba iha públiku nia espetativa katak Forsa Armada, ohin loron, forsa ida ne’ebe kualifikadu intelektualmente, fisikamente no akademikamente.

Iha biban ne’e,  Diretór Interinu IDN, Guilherme Soares, hatutan liu tan katak IDN sai hanesan fatin fó formasaun ba futuru líder Estadu no Nasaun.

Partisipantes husi  Kursu ba Promosaun Kapitaun ba da-ualu husi F-FDTL ne’e, hala’o hela formasaun iha Sentru Treinamentu Nicolau Lobato, Metinaru, Dili, durante fulan 6 nia laran.

Reportagem : Joanito Rangel.

 2,155 Tatal Lee,  3 Views Today