Díli, yokalaumedia.com (05/10/2023)- Primeir-Ministru (PM), Kay Rala Xanana Gusmão ho Ministru Joventude Desportu Arte no Kultura (MJDAK), Nelyo Isaac Sarmento, despede atleta hamutuk na’in 11 husi Comité Paralímpiku Nasionál Timor-Leste (CPNTL) hodi ba partisipa jogu Asian Games ba dala XIX iha Hangzhou Xina.

Ministru Joventude Desportu, Arte no Kultura (MJDAK), Nelyo  Isaac Sarmento, esplika atleta Paralímpiku preparadu no prontu ona atu ba partisipa iha Asian Paralímpiku iha Hangzhou-Xina.

“iha semana rua tan jogu ASIAN GAMES ba dala 19  iha Hangzhou sei  termina no kontinua kedas ba jogu Asian Paralímpiku. Tanba ne’e mak ita nia delegasaun atleta Timor-Leste sei ba partisipa, no sira sei aranka husi ne’e iha loron 15 fulan-Outubru no delegasaun sei ba hamutuk ho atleta hamutuk nain 11 , total hamutuk delegasaun Ne’ebé sei akompaña atleta sira no mos ofisiais Hamutuk nain 25”, katak Nelyo Isaac Sarmento, iha Palasiu Governu, Kuinta-Feira, (05/10).

Governante ne’e mos garante katak atleta para Olímpiku sei hamorin Timor-Leste liu husi sira nia prestasaun.

“atleta paralímpiku sempre hamorin beibeik Timor nian naran iha jogu internasionál sira, ita espera katak tinan ida ne’e mos  sira fila mai ho nafatin prestasaun ne’ebe mak ita hotu-hotu espera. Ha’u fiar katak sira hotu-hotu preparadu ba ida ne’e no iha komitementu, li-liu ba atleta sira ne’ebé pernah juara Ona  no sira Sei mantein buat ne’ebe sira hetan ona. Ita orgullu ho prestasaun ne’ebe sira fo mai povu Timor-Leste”,  hatutan governante.

Pasquela dos Santos Pereira hanesan Atleta ténis meza ne’ebé hetan terseiru lugar iha ténis meza jogu Asian GAMES 2018 nian, hateten sei esforsu an makas liu tan iha jogu tuir mai hodi hamorin Timor-Leste naran.

Iha fatin hanesan, Primeiru Ministru mos husu ba atleta sira ne’ebé sei ba tuir jogu iha Hangzhou Xina atu fila fali mai hodi dezenvolve área desportu iha ita nia rain.

Entretantu, atleta sira ne’ebé ba tuir jogu Asean para Olímpiku kompostu husi modalidade tolu hanesan, Hit besi, atletismu no Ténis meza.

Reportagem: Joanito Rangel

 5,764 Tatal Lee,  2 Views Today