Díli, yokalaumedia.com (05/10/2023) – Ministru Negósiu Estranjeiru no Kooperasaun (MNEK), Bendito dos Santos Freitas, Kuarta-Feira ne’e, hamutuk ho Enkaregadu Negósiu Embaixada Austrália iha Timor-Leste, Caitlin Wilson, ofisialmente lansa Australia’s New International Development Policy iha Timor.

“ami nia Ministra Negósiu Estranjeiru no Ministru Dezenvolvimentu Internasional ofisializa ona polítika ne’e iha fulan agostu liu ba, tanba ne’e mak mos hakarak halo lansamentu ba polítika refere tan importante tebes ba dezenvolvimentu tuir kontestu Timor-Leste nian. No polítika ne’e mos fo enfaze ba etapa furak ne’ebe mak sei mai”, hateten Caitlin Wilson, iha kuarta-feira (04/10) ne’e.

Diplomata australianu ne’e mos afirma Austrália nia kompromisiu atu servisu liu tan ho parseiru nune’e bele define programa prioridade sira.

“polítika ne’e la’os hanesan dokumentu furak de’it, maibe fo momentu importante ba Austrália hodi servisu besik liu tan ho parseiru sira ne’ebe lidera husi governu Austrália hodi bele define programa prioridade foun sira”, afirma Wilson.

Bendito Freitas konsidera asuntu ne’e importante tan bele reafirma liu tan kompromisiu Austrália nian ba apoia dezenvolvimentu nasional.

“ha’u hanoin, Austrália sai hanesan parseiru istóriku no importante ida ba Timor-Leste. eventu ohin ne’e importante tebes tan bele reafirma ita nia komitmentu ba dezenvovlvimentu no mellora liu tan servisu ne’ebe bele suporta dezenvolvimentu internasional, hanesan fator dezenvolvimentu ekonómiku no dezenvolvimentu iha área seluk mos”, hateten Bendito Freitas.

Membru Governu ne’e mos subliña liu tan katak Timor adota polítika externa ne’ebe la iha aliadu no la iha inimigu, maibe iha amigu ho ema hotu, ne’ebe garante paz no estabilidade hodi servisu hamutuk ba dezenvolvimentu nasional.

Serimonia ne’e realiza iha Timor Plaza no partisipa husi Vise-Ministra Finansa, SEI Liña Ministerial sira, funsionáriu sira no Sosiedade Sivil.

Reportagem : Mário da Cruz

 959 Tatal Lee,  2 Views Today