Maliana, yokalaumedia.com ( 09/10/2023) – Primeiru-Ministru (PM), Kay Rala Xanana Gusmão  dezafia Igreja Katolika Timor-Leste atu investe makas hadi’a kualidade edukasaun  iha Universidade Católica Timorense (UCT) no eskola katólika hotu.

Xefe Governu Xanana Gusmão lansa dezafiu ne’e bainhira partisipa iha selebrasaun aniversáriu husi Eskola Colégio Infante de Sagres Maliana- Bobonaro ba dala- 75 (konta husi tinan 1948).

“Ha’u ko’alia kona-ba universidade atu hasa’e kualidade ensinu iha Timor-Leste, universidade sira, UNDIL, UNPAZ, UNTL sira hotu hanorin enfarmajen, maibé Universidade Katoliku mós hanorin fali enfarmajen. Universidade Katolika tenke hanorin filosofia atu sai exelente iha rai ida ne’e no hanorin lisaun sira uluk nian atu prepara sidadaun ba futuru nasaun no Igreja nian”, hateten Xanana iha diskursu iha Bobonaro, Sabado (07/10).

Primeiru-Ministru mos husu Bispo Dioseze Dili, Maliana no Baucau atu tuur hamutuk ho padre no madre hodi deskute mudansa ba sistema edukasaun iha Universidade Católica Timorense (UCT) atu sai diferente ho universidade privadu no institute superior sira tanba tuir Xanana katak Igreja Katolika iha misaun bo’ot maka hasa’e kualidade edukasaun,  dixiplina no moris nu’udar sarani Katolika tenke diferente ho universidade seluk.

“Ha’u husu favor ida amu sira, muda tok Universidade Katoliku Dili, sai Universidade de exelensia, hanorin filosofia, hanorin buat sira ne’ebé di’ak hodi kria nova jerasaun futuru ba rai ne’e”, PM husu.

Lider timor oan ne’e mos fo hanoin fali mehi husi Saudozu Bispo Baucau, Don Basilio do Nascimento ne’ebe atu harii Universidade Katolika ne’e iha Soibada, fatin istóriku ba Igreja nian, maibé pedidu ne’e bispu maktoban la aseita hodi halo servisu barak la’o paradu.

Responde ba preokupasaun ne’e, Bispu Dioseze Maliana, Noberto do Amaral, hateten problema edukasaun iha Timor-Leste sei hasoru dezafiu oin-oin no parte Igreja rasik sei tuur hamutuk hodi hadi’a no aposta makas iha kualidade edukasaun.

“Ba preokupasaun ne’ebé Maun Boot Xanana tau, Universidade Katolika iha komplikasaun bo’ot Igreja nia laran, ne’e duni ha’u husu bele komprende ituan ba, tanba ida ne’e ami sei rezolve hela, depois sei haree didi’ak”, dehan Bispo.

Dom Noberto hatutan Igreja Katolika sei halo regra mós ba eskola hotu Igreja Katolika nian hodi mantén dixiplina no regras hotu hodi motiva estudante sira bele aprende no estuda hodi sai ema ida edukativu tuir Igreja nia hanorin.

Iha fatin hanesan, Dom Noberto do Amaral no Reprezentante Vátikanu iha Timor-Leste, Núnsiu Apostóliku, Monseñor Marco Sprizzi, informa selebrasaun tinan 75 Eskola Colégio Infante de Sagres Maliana nu’udar momentu istóriku no importante tebes ba sarani Bobonaro, tanba eskola ne’e konsege forma rekursu umanu Timoroan barak sai padre, madre no sai lider  intelektuál hodi kontribui dezenvolvimentu edukasaun iha Timor-Leste.

Reportagem : Eva Ximenes

 10,822 Tatal Lee,  3 Views Today