Díli, yokalaumedia.com (12/10/2023) – Ministériu Edukasaun liu husi Sekretáriu Estadu Ensinu Sekundáriu Jerál no Ensinu sekundario Tékniku Vokasionál hodi publika katak Ezame Nasionál ba Ensinu Sekundária no Bázika sei realiza iha loron 16 fulan Outubru tinan ne’e.

“Ezame Nasionál ne’e nu’udar parte integrante hosi sistema edukativu Timor-Leste nian no rezultadu ezame Nasionál ne’e útil tebes Atu halo diagnosa ba problema Sira ne’ebé mosu iha Prosesu aprendizajen, purtantu ezame Nasionál ne’e sei realiza hamutuk no simultaneamente ba iha klase da-siak (da-9) Ensinu Báziku no klase dasanulu resin-ruak (da-12) Ensinu Sekundáriu, iha segunda-feira, loron 16 fulan-outubru tinan 2023 “, hateten Domingos Lopes Lemos, iha Vila Verde Díli kuarta Feira (11/10) ne’e.

Sekretáriu estadu ne’e mos husu ba inan-aman sira atu kria kondisaun ba labarik sira hodi prepara an ho di’ak atu hasoru ezame refere.

” Nu’udar inan-aman, ha’u senti mós saida mak ita-nia oan sira senti. Iha esperansa atu hetan rezultadu di’ak, maibé iha mós preokupasaun balun. Nune’e, maluk inan-aman sira! Mai ita kria ambiente ne’ebé trankilu no konfortável ba oan sira atu estuda iha uma. Nu’udar inan-aman no enkaregadu edukasaun, presiza evita situasaun ruma ne’ebé bele perturba labarik sira-nia preparasaun hasoru Ezame Nasionál”, Domingos husu.

Iha fatin hanesan Domingos mos rekomenda ba profesor sira atu kolabora ho inan-aman hodi prepara estudante sira hodi atu hetan rejultadu pozitivu.

“ha’u enkoraja ita-boot sira, atubele kopera ho inan-aman hodi prepara oan doben sira hodi tuir Ezame Nasionál ne’e no sira bele hetan valor ne’ebé di’ ak”, Rekomenda Domingos.

Nia mos informa katak númeru estudante ne’ebe sei tuir ezame Nasionál ho total hamutuk na’in 56.495, Husi númeru ne’e klasifika ba parte tolu maka Ensinu Báziku 3º siklu hamutuk na’in 29.100, Ensinu Sekundáriu Jerál hamutuk na’in 23.256 no Ensinu sekundariu Tékniku Vokasionál hamutuk na’in 4.142.

Entretantu total disiplina ba ensinu báziku 3º siklu hamutuk 6, Língua portuguesa, Língua Inglesa, matemátika, siensia físika naturais, História, Geográfia no Tétun enkuantu ba ensinu sekundariu jerál 7 no Tékniku Vokasionál hamutuk 6.

Reportagem : Joanito Rangel

 7,803 Tatal Lee,  4 Views Today