Díli, yokalaumedia.com (24/10/2023) – Komandu Polisia Nasional Timor-Leste hamutuk ho AESPNTL (Assosição Esposas Policia Nacional de Timor-Leste), servisu ho Fundasaun Alola iha programa HALIKU (Ha’u Hili Atu Kura), no Ministériu Saúde, Departamentu Moras la Hada’et (Non CDC), hala’o Whorkshop kona ba “Kankru susun no kankru Serviks, komemorasaun Pink Outobru”, iha Comoro, Díli Timor-Leste.

Prezidente Asosiasaun Espoza Polisia Nasional Timor-Leste (AESPNTL), Manuela de Araújo, hateten Asosiasaun ne’e hamri’ik hodi hakarak servisu ho hamutuk Estadu no Governu tantu NGO nasional, internasional, Relizioju sira, Juventude sira no mos ba komunidade sira.

“AESPNTL ne’e hamri’ik iha dia 21 de abríl de 2023, Asosiasaun ne’e hari’i ho vizaun no Misaun, iha vizaun ida ne’ebé ami hafanun parseiru atu moris iha naroman no unidade, nia misaun ne’e ami atu apoiu teb-tebes ba ami nia parseiru sira hanesan membru PNTL iha terrenu, no mos ami nia program mak ami hakarak servisu hamutuk ho Estadu, ho mos Governu RDTL, no mos husi NGO nasional no NGO internasional  nian, no mos ba Reliziaun sira, no mos hakarak servisu hamutuk ho juventude sira no mos ba komunidade sira”, hateten Prezidente AESPNTL.

Iha fatin hanesan, Komandante Jeral PNTL Komisariu Jeral Polisia Henríque dos Santos, rekoñese importánsia husi semináriu ne’ebe organiza husi AESPNTL tanba durante ne’e membru PNTL barak mak sofre moras kankru ne’e balun mos lakon vida.

“Ohin oportunidade ida ke di’ak tebes ba ita, tanba husi parte AESPNTL organiza whorshop ida liu-liu liga ba kankru, ita hatene katak ida ne’e mos sai hanesan preokupasaun ida ita nian tanba ita nia membru barak mos hetan moris ida ne’e, balun mos lakon vida. Ita nia PNTL mos iha departamentu Saúde entaun programa sira ita bo’ot nia suporta tan ami, no ami mos esforsa-an atu nune’e bele suporta ita bo’ot sira nia atividade hodi kontinua ba oin”, afirma Komisariu Jeral.

Sorin seluk, Prezidente Ezekutivu Fundasaun Alola, Manuela de Araújo, hateten, Pink October ne’e kuñesidu ba mundu tomak hodi konsensializa prevene kankru susun.

“Ohin hanesan ita hala’o sosializasaun hodi hamutuk ita prevene kankru susun, ita tenki ko’alia hanesan ne’e tanba pink oktober ka kor de Roza ida ne’e kuñeside ba mundu tomak konsidera fulan mundial konsensializasaun prevene kankru susun, tanba ne’e mak fundasaun alola liu husi nia programa HALIKU iha parte ne’e, ami iha programa ha’at (4), programa saúde, programa edukasaun, programa hakbi’it ekonomia feto no programa advokasia. HALIKU pretende hasa’e konsiensia kona ba moras kankru, tantu kankru susun no kankru servik inklui deteksaun sedu ho tratamentu no mos oinsa ema ho kbi’it la’ek sira no ema hotu atu asesu ba Hospital sira ne’ebé iha fasilidade di’ak”, dehan Prezidente Fundasaun.

Vise Ministru Saúde, Jose dos Reis Magno, esplika katak ministériu estabelese ona fatin no kondisaun apropriadu hodi tulun pasiente moras kankru, hanesan iha Baukau, sei hari’i tan Ospital Nasional Guido Valadares, Sentru Komunitaria Comoro no Estabelese tan iha Teritoriu Timor-Leste.

“agora ita iha Instituisaun Saúde Primária nu’udár departamentu ida espesifikamente ba kankru serviks, semana kotuk mos ami lansa ona, kondisaun balun relasiona ho kankru ne’e iha Baucau para atu bele hare’e kona ba Baukau Rasik nune’e kobre mos Manatuto, Viqueque no Lospalos, la kleur tan sei estabelese tan iha klinika espesial ida iha HNGV, iha Sentru Komunitária Comoro, nune’e mos ita sei estabelese tan Ospital sira seluk ne’ebé mak iha Timor-Leste nia laran tomak”, Promete Vise-Ministru Saúde.

Reportagem: Cedelizio do Rêgo

 3,057 Tatal Lee,  4 Views Today