Lautem-Maina I, yokalaumedia.com (13/11/2023) – Tuir kalendáriu husi Ministériu Administrasaun Estatal katak Eleisaun xefe suku realiza no iha loron 28 Outubru maibe suku balun tenki hakat ba segunda volta tanba la iha kandidatura ruma mak manan ho persentajem 50+1 iha eleisaun primeira ronda.

Suku Maina I mos hanesan suku ida ne’ebe hakat mos ba segunda ronda iha ne’ebe kandidatu Idelfonsu Da Costa no  Martino Junior Pinto mak hadau malu atu hakat ba lidera Suku refere ba tinan hitu oin mai.

Iha eleisaun ne’e Kandidatu ho númeru sorteiu 2, Martinho Junior Pinto mak eleitu ba Xefe Suku hodi lidera Maina I ba tinan 7 oin mai tanba rekolla votu hamutuk 67, enkuantu Kandidatu ho númeru sorteiu 1, Ildefonso da Costa, la konsege tanba rekolla de’it votu 51, no Votu Nulu hamutuk 5.

Pedro da costa, Sidadaun, esplika katak sira iha obrigasaun atu ezerse nia votu ba kandidatura ne’ebé nia fiar katak bele lidera suku ida ne’e.

“nu’udar sidadaun ida ita tenki zere ita nia votu hodi legitima kandidatu ida ne’ebé tuir ita nia konsensia, atu nune’e konfiansa ne’ebé ita fo ba nia atu aban bairua nia bele  sai  serbidor ba ema hotu-hotu tuir espetativa ne’ebé ita hotu hein e liu-liu suku ida ne’e hein, la’os sai fali mandor,” esplika Pedro.

Sidadaun ne’e mos husu ba kaididatura eleitu husi povu atu asume knar ne’e ho responsabilidade, maibe la’os hanesan oportunidade.

“Ita hein katak se na’in rua ne’e ida eleitu sai nu’udar lideransa komunitaria hodi dezemvolve suku ida ne’e tuir sira nia misaun no vizaun rasik bazeia ba planu dezemvolvimentu nasionál. No sira mos tenki buka meiu sira atu resolve komunidade sira nia peokupasaun no interese komun nian la’os interese particular no grupu nian”, Husu Pedru.

Iha fatin hanesan, pesoál STAE, Ronaldo da Cruz, afirma katak iha elesaun segunda volta ne’e partisipasaun eleitor sira nian menus liu kompara ho eleisaun pimeru volta.

“tuir ha’u nia hare eleisaun ida ohin la hanesan ho eleisaun ida uluk tamba iha primeiru volta ne’e ema ne’ebé partisipa hamutuk 159, maibe ohin ema ne’ebé partisipa iha eleisaun hamutuk 123, ema ne’ebé mak la tuir vota barak liu mak estudante sira ne’ebé hala’o sira nia estudu iha kapitál no inan-aman balun mos la mai tuir eleisaun tamba distansia mak do’ok liu”, afirma Ronaldo.

Tuir observasaun jornalista www.yokalaumedia.com iha terenu katak eleisaun ne’e hetan observasaun husi CNE no mos hetan siguransa husi PNTL.

Reportagem: Joanito Rangel

 2,502 Tatal Lee,  2 Views Today