Bobonaro, yokalaumedia.com (19/11/2023) – Diretor Centru Nacional Chega, Institutu Publiku (CNC,IP), Hugo Maria Fernandes apresia ho sidadaun Bobonaro ne’ebe hatudu atetude di’ak hodi akomoda vizitante sira husi Indonézia no Munisipiu seluk durante realizasaun festival Fronteira iha Maliana-Odomau.

Apresiasaun ne’e hato’o bainhira ofisdialmente ensera Festival Fronteira tinan 2023 ne’ebe organiza ho tema “INTERKAMBIU KULTURAL BA HAMETIN REKONSILIASAUN”.

“Ohin kalan ida ne’e ha’u hamri’ik iha ne’e hodi hato’o ha’u nia apresiasaun ida as liu ba timor oan, espesialmente ba iha komunidade Bobonaro tamba durante loron tolu hatudu ona karakter Timor oan hanesan ema ho karakter umanizmu, solidáriu no oin na’in”, apresia Diretor CNC,IP, Sabado (18/11).

Hugo mos relata katak durante loron tolu hahu husi loron 16-18 fulan Novembru tinan ne’e aktividade la’o ho hakmatek, hasoru malu ho oin midar ho oin hamnasa tanba ida ne’e mak ita nia identidade luta ba tempu naruk hodi hatudu ba mundu katak ida ne’e mak Timor oan.

Hugo esplika katak bainhira iha tinan 24 liu ba lider Konsellu Nasional Rezistensia Timorense Joven no Lider sira hatur kedas konseitu ho prinsipiu Rekonsiliasaun.

“Ha’u hakarak sita iha ne’e hanesan mos hakerek iha relatoriu chega hateten katak rekonsiliasaun ne’ebe trasa husi ita nia lideransa istoriku, nu’udar prosesu ida hodi rekoñese sala sira iha pasadu inklui arependimentu no mos perdaun nu’udar pasu ida importante hodi hetan justisa no rekonsiliasaun hodi involve ema timor oan sira bele hakotu tiha siklu akuzasaun, bosok no mos dun malu prosesu ne’e no labele hare deit ba  mekanizmu ida ba rezolusaun konflitu ka nu’udar instrumentu politika hodi pasifika ka reintegra ema hodi rekonese ita nia independensia, rekonsiliasaun hanesan prosesu ida hodi hetan lia los no hetan rezultadu”, konta Diretor Hugo.

Enkuantu iha loron 3 nia laran aktividade ne’ebe mak realiza hanesan kolokiu seminar koalia kona ba lasus kulturais, memoria koletiva no oinsa mak uza arte  no literatura atu hametin  dame hanesan timor oan.

“Aktividade durante loron tolu nia laran ne’e ita realiza hanesan kolokiu seminar, memoria koletiva no oinsa uza arte no literatura hodi hametin dame no lasus kulturais, lisan ne’ebe mak hametin ita hanesan Timor oan bainhira ha’u temi Timor oan hanesan timor oan iha Timor-Leste no Timor oan iha Osidental”, afirma Hugo.

Reportagem : Eva Ximenes

 4,707 Tatal Lee,  1 Views Today