Dili, yokalaumedia.com (30/11/2023) – Primeiru-Ministru (PM) , Kay Rala Xanana Gusmao simu vizita kortezia husi Embaixadór Austria ba Indonézia, Thomas Loidl, hodi rona  Austria nia komprimisiu atu hametin kooperasaun diplomatiku no sei loke Konsuladu iha Timor-Leste.

Thomas Loidl agradese tanba sorumutu ho Xefe Governu timorense, Kay Rala Xanana Gusmão, hodi informa programa sira ne’ebé Austria hakarak koopera ho Governu Timor-Leste  ba promove demokrasia no valor direitu umanu sira.

“Previlejiu hasoru Primeiru-Ministru, Timor-Leste no Austria hanesan nasaun kiik, no Timor-Leste pais kiik ida iha Sudeste Aziátiku, enkuandu Austria nasaun kiik ida iha kontinente Europa hakarak partisipa no promove valór demokrasia no direitus umanus no hasoru Primeiru-Ministru hodi informa katak, ami hakarak loke ami nia Konsuladu Austria iha Timor-Leste”, informa  Embaixador Austria, Thomas Loidl ba jornalista, hafoin enkontru ho PM Xanana  iha Palasiu Governu, Dili.

Embaixador Thomas Loidl informa bainhira Austria loke ona Konsuladu iha Timor-Leste maka nasaun rua sei hametin liu tan kooperasaun diplomatiku iha área saúde no dezenvolve infra-estrutura baziku.

Austria nu’udar nasaun belun di’ak ida ne’ebé iha dezde tempu rezistensia tanba fasilita no apoiu Timoroan sira iha Austrai  luta ba Timor-Leste nia  independensia.

IX Governu Konstisionál define Timor-Leste nia polítika esterna ho prinsípiu ida- ne’ebé konsagra sentidu independénsia no soberania mak: “Ba Timor-Leste, Laiha Aliadu ka Inimigu, Hotu-Hotu sei Hamutuk no AMIGUS de’it!”. Ida ne’e sai hanesan (Timor) ita-nia Lema, ne’ebé sei orienta ita iha Relasoens Esternas, iha Konjuntura Internasionál ida ne’ebé daudaun ne’e defisil tebes.

Maske, Timor-Leste sei joven ka sei frájil, maibé Timor-Leste iha mehi boot ho esperansa no konfiansa katak bele mantein paz, moris sosiál, hadi’a justisa no konsolida instituisaun estadu. Ida ne’e hotu nu’udar pilares fundamentais atu atrai investimentu hodi dezenvolve ita-nia setór ekonómika no hadi’ak kondisaun sosiál, husi dalan ne’ebé sustentável.

Reportagem : Eva Ximenes

 736 Tatal Lee,  2 Views Today