𝐆𝐨𝐯𝐞𝐫𝐧𝐮 𝐈𝐗 𝐒𝐚ú𝐝𝐚 𝐃𝐞𝐛𝐚𝐭𝐞 𝐊𝐨𝐧𝐬𝐭𝐫𝐮𝐭𝐢𝐯𝐮 𝐤𝐨𝐧𝐚-𝐛𝐚 𝐎𝐉𝐄 2024

Díli, yokalaumedia.com (15/12/2023) – Governu IX Saúda Debate Konstrutivu kona-ba OJE 2024.

Governu Konstitusionál IX hato’o ninia kompromisu kontínuu ba prosesu orsamentál ida ne’ebé transparente no demokrátiku nomos hato’o apresiasaun ne’ebé bo’ot tebes ba debate konstrutivu ne’ebé la’o hela iha Parlamentu Nasionál kona-ba Proposta Lei Orsamentu Jerál Estadu ba tinan 2024.

Iha kontestu ida-ne’e, Governu valoriza kontribuisaun, proposta no sujestaun sira ne’ebé distintu deputadu sira hosi bankada parlamentár sira hotu aprezenta ona. Transparénsia no pluralidade opiniaun reflete vitalidade demokrasia nasionál, ne’ebé nu’udar pilár fundamentál ida ba dezenvolvimentu sustentavel país nian.

“Ami agradese mós desizaun hosi Parlamentu Nasionál hodi aseita pedidu debate ho karater urjente kona-ba Proposta Lei Orsamentu Jerál Estadu ba tinan 2024, ho subliña importánsia hosi desizaun ida-ne’e, bele evita prorrogasaun vijénsia Lei Orsamentu Jerál Estadu tinan 2023 nian ba tinan 2024 no, tanba ne’e, aplikasaun hosi rejime duodesimál”.

Governu rekoñese no elojia argumentu klaru sira ne’ebé deputadu sira hosi bankada parlamentár Governu nian aprezenta, ne’ebé dezempeña ona papél importante ida hodi esklarese proposta sira iha diskusaun. Forma debate Orsamentu Jerál Estadu tinan 2024 nian ne’ebé demokrátika no konstrutiva nu’udar sasin ida hosi kompromisu koletivu hodi hetan desizaun sira ne’ebé iha benefísiu ba povu timoroan.

Prezidente Parlamentu Nasionál merese liafuan ida tanba ninia kapasidade no esforsu hodi lidera debate ne’e, maske iha momentu sira ne’ebé iha tensaun ne’ebé boot tebes, ne’ebé nu’udar karaterístika hosi demokrasia ne’ebé dinámika.

Ezekutivu reafirma ninia disponibilidade hodi kontinua fó esklaresimentu nesesáriu sira hotu ba membru Parlamentu Nasionál sira no Governu kompromete ona hodi rona preokupasaun no kontribuisaun sira hosi Prezidente Parlamentu Nasionál no distintu deputadu sira hotu to’o debate ne’e remata.

Governu reafirma ninia kompromisu hodi ezekuta orsamentu ne’ebé submete ona hodi hetan apresiasaun hosi distintu deputadu sira ho sentidu responsabilidade tomak, ho objetivu atu implementa projetu no programa sira ne’ebé promove dezenvolvimentu sustentavel país nian no hadi’a kualidade moris sidadaun sira nian.

Portavós hosi Governu Konstitusionál IX, Ministru Agio Pereira hato’o ninia agradesimentu “ba abordajen demokrátika no konstrutiva ne’ebé adota hosi membru Parlamentu Nasionál sira hotu durante debate ne’e” no rekoñese katak “komentáriu, sujestaun no krítika konstrutiva sira hariku diskusaun no sei kontribui ba implementasaun ida ne’ebé efikás liu hosi Orsamentu ida-ne’e, ne’ebé maka pertense ba timoroan sira hotu no prepara ba timoroan sira hotu”.

Reportagem : Eva Ximenes

 624 Tatal Lee,  2 Views Today