Díli, yokalaumedia.com (28/12/2023) – Ohin organizasaun intergovernamental G7+ Asina Memorandu entendementu ho ministériu Interiór hodi promove paz.

Sekretariu Jerál G7+, Helder da Costa agradese ministériu Interiór tamba fo konfiansa maximu ba G7+ nu’udar parseiru Estratéjiku hodi asina MoU ida ne’e ba proximu tinan 5.

“Ita identifika ona iha MoU ida ne’e iha área sira hanesan edukasaun sivika, promosaun paz no ita bele tun ba baze hodi halo sosializasaun hodi promove paz iha ita nia rai laran”, esplika Sekretariu Jerál G7+, Helder da Costa, iha salaun g7+, kinta-Feira, (28/12).

Helder mo’s informa katak misaun g7+ nian mak atu promove paz iha rai laran no fahe esperensia ba rai liur.

“Nune’e ami sente onra bo’ot no Previlejiu hodi asina MoU ida ne’e no antes atu Asina MoU ida ne’e ida loron 11 fulan Dezembru foin lalais ne’e ami simu vizita husi ita nia maun boot Primeiru-Ministru Kay Rala Xanana Gusmão nia mai iha ne’e hanesan ema eminente g7+ nian pasa Natál ho ami no ami mo’s aprezenta kona ba ami nia atividade tinan 2023 nian no mo’s planu Estratéjiku 2024 iha ne’eba ami temi mo’s katak ami sei Asina MoU ho Ministériu Interiór, nia mo’s kontente teb-tebes”, Subliña Helder.

Helder mo’s kompromete katak iha tinan 2024 ba oin G7+ prontu no preparadu hodi servisu hamutuk ho Ministériu Interiór.

Entretantu, Ministru Interiór, Francisco Guterres, sente kontente no agradese tamba organizasaun Intergovermental g7+ bele ajuda ministériu Interiór hodi servisu hamutuk hodi promove paz no estabilidade iha Timor-Leste.

“ha’u hanoin oportunidade ida ne’e importante tebes-tebes tamba g7+ hanesan organizasaun Internasionál ida ne’ebe servisu barak liu atu promove paz”, afirma Franscisco Guterres ho ksolok.

Reportagem : Eva Ximenes

 1,018 Tatal Lee,  2 Views Today