Governu kontinua apoia milaun 15 ba Igreja katólika

Díli, yokalaumedia.com (15/02 /2024) – Governu liu husi Vise-Primeiru-Ministru, Ministru koordenador ba Asuntu Sosiais no Ministru Dezenvolvementu Rurais no Habilitasaun Komunitaria (VPM, MKAS, MDRHK), Mariano Assanami Sabino ohin realiza Nota entendementu ho Igreja Katolika.

Cardeal Virgilio da Silva do Carmo esplika katak ohin data ida ne’ebe tinan-tinan uma kreda Timor-Leste sempre selebra akordu anual ho Governu.

“ha’u ohin reprezenta konferensia piskopal ohin Asina akordo ida ne’e ho IX Governu liu husi Vise-Primeiru-Ministru, Ministru koordenador ba Asuntu Sosiais no Ministru Dezenvolvementu Rurais no Habilitasaun Komunitaria, Mariano Assanami Sabino”, Haktuir Cardeal Virgilio da Silva do Carmo, Hafoin Asina akordo, iha Palasio Governu, Kuinta-Feira (15/02).

Enkuantu orsamentu ne’ebe mak apoiu ba uma kreda Katolika ne’e hamutuk 15 milloens ne’ebe sei aloka ba Dioseze tolu hanesan Dioseze Díli, Baucau no Maliana hodi atribui ba setór Edukasaun, servisu Sosiál no servisu uma kreda ninia.

Cardeal mo’s informa katak subsídiu ne’ebe kada tinan Governu aloka ba uma kreda ne’e hanesan akordu Internasionál ida ne’ebe konkordata ona ne’ebe mak Asina husi Estadu Vatikanu ho Estadu Timor-Leste.

Iha Fatin hanesan VPM, MKAS, MDRHK, Mariano Assanami Sabino mo’s esplika katak akordo ida ohin Asina ne’e fo kuntinuidade ba akordo ne’ebe antigamente iha tiha ona nune’e IX Governu nafatin fo kontinuedade hodi aloka 15 milloens.

“IX Governu nafatin fo importánsia tamba setór Edukasaun ne’e importante no prioridade ba ita nia sosiedade liu-liu Timor-Leste ne’e ba oin, ita hateke ba futuru ba Edukasaun hare ba ita nia Oan sira nia futuru no ba jerasaun Foun sira tamba ne’e mak ami fo apoiu tomak ba Igreja Katolika ne’ebe servisu iha Timor-Leste”, Subliña Governante.

Reportagem : Eva Ximenes

 839 Tatal Lee,  3 Views Today