XANANA: INSS tenki tau priroridade ba “Erois vivos”

Díli, yokalaumedia.com (16/02 /2024) – Primeiru-Ministru (PM), Kay Rala Xanana Gusmão husu ba emposadu Membru Konsellu Administrasaun Institutu Nasionál Seguransa Sosiál (INSS) ne’ebé tutela ba Ministériu Solidaridade Sosiál no Inkluzaun (MSSI) atu servisu makas hodi tau matan ba ferik no katuas sira ne’ebé governu konsidera nu’udar “EROIS VIVOS”.

Iha programa IX Governu Konstitusionál konsidera idozus no familia kbiit laek sira iha teritóriu presiza hetan atensaun makas hosi governu, tanba sira maka terus liu ba luta Timor-Leste nian, nune’e bainhira sira mate, sira bele sente ukun rasik aan too duni ba sira.

“𝐇𝐚’𝐮 𝐡𝐮𝐬𝐮 𝐢𝐦𝐢 𝐭𝐞𝐧𝐤𝐢 𝐬𝐞𝐫𝐯𝐢𝐬𝐮 𝐡𝐨 𝐥𝐚𝐫𝐚𝐧 𝐭𝐚𝐮 𝐦𝐚𝐭𝐚𝐧 𝐛𝐚 𝐤𝐚𝐭𝐮𝐚𝐬 𝐧𝐨 𝐟𝐞𝐫𝐢𝐤 𝐧𝐨 𝐩𝐨𝐯𝐮 𝐬𝐢𝐫𝐚 𝐢𝐡𝐚 𝐚́𝐫𝐞𝐚 𝐫𝐮𝐫𝐚́𝐥 𝐡𝐨𝐭𝐮 𝐛𝐞𝐥𝐞 𝐬𝐞𝐧𝐭𝐞 𝐧𝐨 𝐬𝐢𝐦𝐮 𝐬𝐢𝐫𝐚-𝐧𝐢𝐚 𝐝𝐢𝐫𝐞𝐢𝐭𝐮 (𝐬𝐮𝐛𝐬𝐢𝐝𝐢𝐮) 𝐧𝐞’𝐞𝐛𝐞́ 𝐠𝐨𝐯𝐞𝐫𝐧𝐮 𝐡𝐚𝐬𝐚’𝐞. 𝐋𝐚𝐞 𝐬𝐢𝐫𝐚 𝐧𝐞’𝐞𝐛𝐞́ 𝐢𝐡𝐚 𝐚́𝐫𝐞𝐚 𝐫𝐮𝐫𝐚́𝐥 𝐨𝐡𝐢𝐧 𝐥𝐨𝐫𝐨𝐧 𝐛𝐚𝐥𝐮𝐧 𝐥𝐚 𝐬𝐞𝐧𝐭𝐞 𝐮𝐤𝐮𝐧 𝐚𝐚𝐧, 𝐦𝐨𝐫𝐢𝐬 𝐭𝐞𝐫𝐮𝐬 𝐥𝐢𝐮, 𝐧𝐮𝐧𝐞’𝐞 𝐡𝐚’𝐮 𝐡𝐮𝐬𝐮 𝐢𝐦𝐢 𝐧𝐢𝐚 𝐤𝐨𝐦𝐩𝐫𝐢𝐦𝐢𝐬𝐢𝐮 𝐚𝐭𝐮 𝐬𝐞𝐫𝐯𝐢𝐬𝐮 𝐬𝐢𝐫𝐚 𝐡𝐨 𝐥𝐚𝐫𝐚𝐧, 𝐧𝐨 𝐝𝐨𝐦𝐢𝐧, 𝐧𝐮𝐧𝐞’𝐞 𝐢𝐭𝐚 𝐧𝐢𝐚 𝐩𝐨𝐯𝐮 𝐛𝐞𝐥𝐞 𝐬𝐞𝐧𝐭𝐞 𝐮𝐤𝐮𝐧 𝐚𝐚𝐧 𝐭𝐨𝐨 𝐛𝐚 𝐬𝐢𝐫𝐚, 𝐦𝐨𝐥𝐨𝐤 𝐬𝐢𝐫𝐚 𝐦𝐚𝐭𝐞,” dehan PM Xanana durante hato’o mensajen ba serimónia pose ba estrutura INSS, iha MSSI, Kaikoli, Dili.

Entretantu, estrutura ISS ne’ebé simu pose kompostu hosi, Prezidente INSS, Arlindo Pinto, Dulce Natividade Fátima da Cunha no Solange de Fátima Borger nu’udar Reponsável ba Solidaridade Sosiál, no Reprezentante Empregadór, Sansão Gomes no Almério Vila Nova Gouveia nu’udar reprezentante Traballadór Timor-Leste no sira ne’e knaar reprezenta no sai nu’udar vogál ba INSS-MSSI ninia susesu.

 Xefe Governu Xanana husu bainhira ekipa ne’e hala’o servisu, povu kbiit laek ruma hasoru moris susar ruma, presiza governu tulun, tenki atende ho domin.

“hau la iha liafuan barak atu hato’o ba imi, maibe husu imi sira ne’ebe ohin simu posse ba periodu 2024-2026. Ha’u husu mak atu servisu ho di’ak hanoin di’ak hanoin kbiit laek sira, jere osan ho di’ak atu evita korrupsaun no mal-jestaun no lolo liman sira ne’ebe presiza bainhira sira mai dere imi nia odamatan, dehan PM Xanana.

Iha fatin hanesan, Prezidente INSS, Arlindo Pinto hato’o agradese ba konfiansa hosi governu nian no promote sei hala’o servisu ho ekipa tomak atu fó susesu ba programa sira ne’ebé IX Governu implementa.

Ekipa trasa ona programa prioridade haat ne’ebé sei implementa iha sira nia mandatu hanesan, Harii Sentru Integradu ba ISS, Halo dijitalizasaun ba integrasaun ba baze dadus, Halo jestaun ba pagamentu pensaun Sosiál sira no, Kria lei no harii komite investimentu hodi haree kona-ba kapitalizasaun fundu rezerva sosial.

Programa hirak ne’e públiku bele asesu iha lansamentu portal divulga informasaun servisu sosiál nian ne’ebé sei lansa iha tempu badak.

Entretantu INSS nu’udar instituisaun sub setór ne’ebé ho ninia natureza servisu ne’ebé Konsellu Ministru regula hanesan autonomia administrasaun finanseiru no patrimóniu rasik regula tuir artigu 1 dekretu-lei nùmeru 44/2016, 14 dezembru ba kriasaun INSS ho ninia knaar juridikamente proteje traballadór ho sira nia familia bainhira lakon redimentu ne’ebé mai hosi servisu no knaar servisu sosiál estabelese hodi tulun kondisaun maternidade, paternidade, adosaun, invalidez, veliche no mate.

Reportagem : Eva Ximenes

 1,259 Tatal Lee,  3 Views Today