Díli, yokalaumedia.com (18/02 /2024) – Grupu Organizasaun Raipen Timor-Lorosa’e voluntariamente organiza atividade reflorestasaun, espesialmente, kuda au oan iha Aldeia Suku-Laran, Suku Camea, Postu Administrativu Cristu Rei, Munisípiu Díli.

Reprezentante Grupu Organizasaun Raipen Timor-Lorosa’e, Deonisia de Fatíma Nunes, hateten Sira hanesan voluntariu ne’ebe servisu hamutuk ho Instituto Bambu hodi oferese fini au oan hamutuk 400 hodi kuda iha aldeia Suku-Laran.

“antes ne’e ami diriji karta ida ba Xefe Aldeia Suku-Laran nian no ami mai survey fatin no ohin ami mai kuda au oan iha ne’e tanba fini au oan ne’e ho espésie au audian ne’ebe di’ak tebes hodi ajuda konserva be no bele kaer metin rai “, esplika Grupu Organizasaun Raipen Timor-Lorosa’e, Deonisia de Fatíma Nunes, ba ekipa yokalaumedia.com, iha Aldeia Suku-Laran, Domingo (18/02).

Deonisia mos Informa katak durante ne’e Sira mai halo observasaun uluk ona fatin ne’e no ohin bele realiza duni sira nia atividade kuda au oan ne’e.

Iha Fatin hanesan Xefe Aldeia Suku-Laran, Ana Bela Pires, sente kontente tamba organizasaun Raipen Timor-Lorosa’e ne’ebe ho voluntarizmu hakarak fo tempu bele mai hala’o atividade kuda au oan iha Aldeia ne’e.

“ha’u sente kontente no orgullu tamba liu husi Grupu Organizasaun Raipen Timor-Lorosa’e ne’ebe servisu hamutuk ho Instituto Bambu hodi oferese ona fini au ne’e hodi mai kuda ona iha ita nia Aldeia Suku-Laran”, Subliña Ana Bela.

Xefe aldeia ne’e mos kompromete sei asegura au oan ne’ebe mak kuda ona ne’e hodi asegura rai no bele konserva be ba iha Aldeia ne’e rasik. Alem de ne’e mos husu ba komunidade sira atu labele husik animal hodi estraga plantasaun ne’ebe kuda ho voluntariamente husi Raipen-TL refere.

Nia mos agradese ba foin sa’e sira ne’ebe hanesan membru Grupu Organizasaun Raipen Timor-Lorosa’e no Instituto Bambu ne’ebe ho laran luak oferese ona fini au oan ho montante atus hat.

Reportagem :Eva Ximenes /Joanito Rangel

 2,173 Tatal Lee,  2 Views Today