Primeiru-Ministru husu grupu traballu reforma Justisa aprezenta relatóriu no rekomendasaun

Díli, yokalaumedia.com (19/02 /2024) – Primeiru-Ministru (PM), Kay Rala Xanana Gusmão realiza sorumutu ida ho Grupu Traballu Reforma Justisa, ne’ebe estabelese husi IX governu iha tinan 2023 atu ajuda hadia no reforma sistema justisa iha Timor-Leste ne’ebe koordena husi Ex-Ministra Justisa Lúcia Lobato.

Sorumutu refere akompaña hosi Ministru Justisa, Sergio Hornai no Eis Prezidente Tribunál Rekursu, Cláudio Ximenes , Paula Fernando -CES-Coimbra, Portugál,  Patrick Keuleers  hosi UNDP, Miguel Lemos – Konsultór UNDP, Sahe Silva  Konsultór UNDP no Bruno Lencastre  hosi UNDP, iha Palasiu Governu, Dili.

Durante enkontru ne’e, xefe Governu husu atu prepara relatóriu no rekomendasaun konkreta hodi entrega ba governu.

“ne’ebe grupu traballu apoiu governu atu prepara rekomendasaun konkreta Primeiru-Ministru husu atu grupui traballu aprenzenta rekomendasaun konkreta no lakohi relatoriu naruk, ne’ebe iha rekomemndasaun kurtu prazu ne’ebe mak Governu tenki implementa kedas, tenki iha rekomendasaun mediu no longu prazu,” informa Lúcia Lobato ba jornalista iha Governu.

Koordenadora Grupo Traballu Reforma Setór Justisa, Lúcia Lobato, mos esklarese liu tan katak grupu refere sei halo diagnostiku ba justisa ne’ebe hetan apoiu hosi parseiru internasionál sira hanesan Programa Dezenvolvimentu Nasaun Unida (UNDP), ne’ebe sira rekruta matenek na’in lubuk ida hodi apoia ba Timor-oan  sira.

Ex-Ministra Justisa ne’e mos reforsa liu tan katak sira nia ekipa hasoru ona Prezidente Tribunal Rekursu, Deolindo dos Santos, molok hasoru malu ho Xefe Governu Xanana Gusmão no hakarak mos reune ho Ministru Justisa, Sergio Hornai, Prezidente Repúblika, Bankada Parlamentár sira, Akademiku, advogadu privadu, sosiedade sivil, emprezariu, grupu feto, inklui organizasaun sira ne’ebe tau matan ba atividade direitu labarik.

“tenki tau atensaun maka’as hodi oinsa reforsa rekursu umanu iha setor justisa no iha lei lubuk ida tenki hadi’a, halo lei foun balun no lei balun ne’ebe tenki hasai tiha tamba la kondus ho realidade nasaun nian no hadia dezenvolve infraestrutura setor nustisa nian,” tenik nia.

Grupu ne’e ko’alia ho Prezidente Tribunál Rekursu no Primeiru-Ministru Xanana hodi haree mós kona-ba apoiu formasaun rekursu umanu ne’ebé servisu iha área judiasiru nian.

Entretantu, Primeiru-Ministru mos husu labele ansi atu duni tempu, maibe presija servisu ho di’ak, tanba servisu grupu traballu ne’e nian importante tebes atu ajuda governu hodi reforma setór justisa atu nune’e tribunál sira bele servisu no hatán ba povu tomak nia preokupasaun konaba asesu ba justisa no tribunál sira nia servisu tenki garante justisa ba nasaun nia di’ak.

Reportagem : Eva Ximenes

 984 Tatal Lee,  2 Views Today