Díli, yokalaumedia.com (14/05/2024) – Embaixadór Japaun iha Timor-Leste (TL), Tetsuya Kimura akompañadu husi reprezentante kompañia Tsuneishi Shipbuilding, hodi atualiza progressu rejistu legál no investimentu indústria konstrusaun navál iha Manatuto, bá Primeiru-Ministru (PM) Kay Rala Xanana Gusmão.

“Prezidente Tsuneishi Shipbuilding mai hamutuk ho ha’u hodi atualiza bá Primeiru-Ministru kona-bá dezenvolvimentu hosi sira-nia servisu. Kompañia ne’e mós harii ona sira-nia kompañia lokál iha Timor-Leste,” embaixadór Japaun hateten, hafoin enkontru iha palásiu Governu, tersa-Feira, (14/05/2024).

Kimura mos salienta liu tan katak iha final fulan janeiru, kompañia rekruta ona funsionáriu lokál na’in-rua no fasilita ona bá tuir treinamentu iha Japaun, inklui rekruta ona ema na’in-20 hanesan dezeñadór ró nian no bainhira finaliza sira-nia estudu hosi Universidade Nasionál Timor Lorosa’e (UNTL) sei servisu bá kompañia ne’e.

Kompañia ne’e rejistadu iha Servisu Rejistu no Verifikasaun Emprezariál (SERVE) no sei kompleta rekezitu sira seluk tán, kontinua halo estudu viabilidade atu bele konklui akordu hodi hetan sertifikadu lisensa ambientál, nune’e bele hahú konstrusaun.

Dadaun ne’e iha ona timoroan lubuk ida mak servisu iha Japaun hanesan Technical Intern Training (TIT) iha Kochi Prefecture no foin lalais Sekretáriu Estadu Formasaun Profisionál no Empregu (SEFOPE) vizita ona Japaun hodi asina Memorandum Entendimentu ho Tsukuba city.

Tetsuya Kimura mós atualiza bá Primeiru-Ministru kona-bá projetu dezenvolvimentu asisténsia saúde ne’ebé oferese hosi Japaun, liu-liu projetu instalasaun fasilidade foun iha HNGV no Xefe Governu rasik vizita ona iha semana kotuk.

Reportagem :Eva Ximenes

 564 Tatal Lee,  2 Views Today