Lisboa, yokalaumedia.com (03/06/2024) – Ministru Negósiu Estranjeiru no Kooperasaun (MNEK), Bendito dos Santos Freitas, orienta ona Embaixada Timor-Leste iha Portugál atu, urjentemente, buka mekanizmu hodi solusiona bá konfrontu entre joven sira iha Santuáriu Fátima-Portugal.

Pozisaun govenante nian ne’e hodi hatán bá preokupasaun ne’ebé deputadu Parlamentu Nasionál no públiku Timor sira levanta relativamente ho konfrontu refere, ne’ebé akontese iha madrugada loron 02 fulan Juñu ne’ebe deskonfia envolve Membru Grupu Arte Marsiais 22 (PSHT) ho Arte Ritual 77.

“Preukupasaun ne’ebé Membru Parlamentár sira foti kona-ba akontesimentu konfrontu trájiku entre Timoroan sira iha Portugal, MNEK halo ona chamada para halo kordenasaun urjente ho Embaixadora Timor nian iha Lisboa, atu bele haree situasaun ida-ne’e. Prosesu la’o hela, ita nia Embaixada ho Polísia Judisiáriu Portugeza servisu hamutuk hodi buka solusaun ba problema refere, no mós aproximasaun ho madre sira Leiria Fátima, Embaixadora sira haree hela urjentemente problema ida ne’e no sei utiliza kanál sira hotu atu bele rezolve lalais. Mekanizmu ida mak sei konvoka reuniaun para bele husu rekonsiliasaun ka perdaun entre membru sira”, hatete MNEK.

Membru governu ne’e mo salienta liu tan katak Embaixada Timor-Leste nian iha Lisboa Portugál servisu hamutuk ho Polísia Judisiária no mós Madre sira iha Leiria Fátima, buka hela solusaun bá problema refere, nune’e bele halo rekonsiliasaun entre joven grupu sira.

Governu mós sei bolu ajénsia sira-ne’ebé mak fasilita joven sira bá Portugál ne’e, atu iha responsabilidade ba sira, nune’e antes haruka ba, tenki sira kumpre ba lei no regulamentu husi nasaun ne’e nian.

“Maibé prosesu ne’e tenki iha mós espetativas katak, Governu tenki foti mós solusaun bá ajénsia sira-ne’ebé haruka Timoroan sira bá, sira mós tenki iha responsabilidade moral atu tetu ema sira-ne’e antes bá servisu, sira-nia komprimentu bá lei no regulamentu ne’ebé atu simu Timoroan sira-ne’e, ita atu hatudu nafatin dignidade, prinsípius no valores direitus umanus no liberdade”, hatene Governante bainhira visita Lisboa.

Konfrontu refere rezulta joven mane ida naran Domingos do Rego, moris iha loron 1 fulan Dezembru tinan 1998, husi Tula Takeu, Munisípiu Aileu, lakon vida no na’in lima seluk kanek graves no dadauk ne’e halo hela tratamentu saúde iha ospital Leiria.

Polísia Judisiáriu Portugueza mós dadauk ne’e, investiga hela joven husi grupu rua refere, tanba seidauk identifika joven ne’ebé mate no na’in lima seluk kanek ne’e nia pertensaun iha grupu rua ne’e.

Reportagem : Joanito Rangel

 1,969 Tatal Lee,  2 Views Today