yokalaumedia.com, 13/11/2024 – Proteje Vítima ba Asédiu Seksuál: Prespetiva Vitimolojia.

Hakerek hosi: Constantino de Jesus, Membru Forsa Maubere Advocacy – FM

Kazu “bimbing” iha karreta, mostra ona mai ita kona-ba oinsá sosiedade, maioritáriamente, julga ema-feto ida ka hatuur nia pozisaun sai vítima fila-fila iha kazu asédiu seksuál sira; kazu Topu Honis mós demonstra oinsá sosiedade haliis-an ba autór krime tan kestaun fiar. Primeiru, vítima sira enfrenta agresaun seksuál hosi ema-seluk [mane, dosente ka autór poderozu seluk]. Segundu, sosiedade hatuur sira-nia pozisaun nu’udar sala-na’in ho prezunsaun katak sira mak provoka, hakarak, buka, ka seluk tan; ka autór nunka atu halo krime tanba nia la’os ema kriminozu (bibi-atan ka padre ida); ka tanba mane sempre loos. Karik prosesu judisiária termina maka tribunál halivre tan suspeitu ka arguidu, ema-ne’ebé hasoru sofrimentu, sai vítima fila-fila ba dala tolu. No dahikus ne’e grave tebes, tanba aleinde husik kriminozu ida la’o livre sein pena, tribunál mós hakoi lia-loos ne’ebé grupu inferiór sira hakarak defende.

Foin lalais mosu tan kazu asédiu seksuál iha UNPAZ. Dosente ida kaer estudante-feto ida nia isin-lulik, nia isin parte privadu. Estudante feto refere aten-barani hodi koalia sai, ka hato’o keixa. Konserteza, kazu hanesan ne’e barak tebes, maibé vítima sira ta’uk atu koalia sai. Vítima nia rezisténsia ba kazu ne’e loke odamatan hodi ita deskobre katak durante ne’e dosente refere halo barak ona ba estudante sira. Tansá konkluzaun ipotétiku ne’e mosu? Primeiru, tanba ita-nia análize sadere-an ba relasaun podér entre arguidu ho vítima, iha ne’ebé parte rua nia pozisaun kualitativamente diferente; segundu, sistema edukasaun-kuríkulu, sobretudu kondisaun kampúz ne’ebé halo estudante sira sai atan iha prosesu apriendizajen. Estudante sira ta’uk no subordina de’it.

Iha kazu sira hanesan ne’e, saida mak ita tenki halo? Naka’it ba ne’e mak perspetiva vitimolojia importante tebes. Primeiru, hatuur-an iha vítima nia fatin no nia sorin nu’udar meiu hodi hasees-an hosi dominasaun ideolojia ne’ebé suporta arguidu [ideolojia patriarkál]. Segundu, foti pozisaun iha vítima nia sorin ka fatin, iha relasaun podér ida, hodi próteje vítima no reziste hasoru dominasaun no prezunsaun negativu sira. Terseiru, foti pozisaun iha vítima nia sorin hodi deskobre lia-loos liuhusi suporta nia ba deskobre lia-loos tuir dalan legál.

𝗣𝗲𝗿𝘀𝗽𝗲𝘁𝗶𝘃𝗮 𝗩𝗶𝘁𝗶𝗺𝗼𝗹𝗼𝗷𝗶𝗮

Etimolójikamente, vitimolojia mai hosi liafuan victim [vítima] no logos [siénsia/koñesimentu]. Signifika, vitimolojia katak siénsia kona-ba vítima. Detalladamente, vitimolojia nu’udar siénsia ne’ebé estuda kona-ba vítima, kauza hamosu vítima no oinsá rekupera vítima nia direitu ne’ebé violadu. Hirak ne’e nu’udar problema ema-nian ne’ebé akontese iha realidade moris (Jainah & Seftiniara, 2019).

Siénsia vitimolojia ne’e mosu tanba prosesu judisiária sira ne’ebé dalabarak hatuur vítima iha ninin no halo nia lian lakon. Dalaruma, meiu investigasaun ne’ebé la empodera vítima-feto tan pergunta sira ho forma patriarkál. Sorin-seluk, prosesu legál sira ne’ebé pról ka haliis liu ba arguidu hodi rezulta ema ida sai vítima fila-fila iha prosesu ida nia laran. Seluk hosi ne’e, iha kazu agresaun no asédiu seksuál sira, dalabarak, sosiedade fó presaun ba vítima, liuhusi duun ba nia, katak seksualmente, nia mak nu’udar provokadora.

Nu’udar siénsia ne’ebé atu estuda kona-ba tanbasá eziste vítima iha moris reál, vitimolojia kompostu hosi entendimentu katak: dimensionalmente, krime nu’udar problema ema-nian; krime hanesan rezultadu hosi interasaun tanba interrelasaun entre fenómenu sira ne’ebé eziste no influensia malu; nu’udar indivíduu ida nia asaun ne’ebé hetan influénsia husi elementu sira estrutura sosiál partikulár hosi sosiedade partikulár ida [ibid].

Vitimolojia sai hanesan perspetiva ne’ebé kontraditóriu ho pozitivizmu wainhira define kona-ba vítima. Pozitivizmu define vítima mak ema ida-ne’ebé ema-seluk viola ninia direitu ne’ebé proteje hosi lei. Nune’e, pozitivizmu-legalista haree no kualifika ema ida nu’udar vítima tanba iha violasaun ba direitu protejidu hosi lei. Definisaun ne’e limite de’it hosi konteúdu legál. Enkuantu, siénsia vitimolojia uza paradigma sosiolójiku hodi esplika ka fihir ema ida nu’udar vítima, nune’e, nia definisaun kona-ba vítima ne’e sosiolójiku (Indah, 2014). Tanba aplikasaun Direitu penál ba kazu ida nunka-mais sees-hosi sosiedade ninia definisaun kona-ba aktu kriminál no vítima ne’e rasik. Purezemplu, ideolojia patriarkál ne’ebé dominante bele influénsia mós aplikasaun lei hodi halo vítima la konsege deskobre lia-loos.

Bele iha vítima tanba iha kauza konkretu mak hanesan asaun konkretu ne’ebé pratika hosi ema ka pesoa determinadu ida. Vítima mak ema ne’ebé hetan prejuizu/sofrimentu mentál ka fíziku ruma hosi aktu kriminál [Gosita, 2019]. Ita-nia lei define vítima ka lezadu nu’udar asistente prosesuál, katak “os ofendidos, considerando-se como tais o titular do interesse que a lei especialmente quis proteger com a incriminação, desde que maior de 16 anos”, artigu 71.° hosi Kódigu Prosesu Penál [2.a alterasaun]. Siginifika, kualkér ema ida ne’ebé senti ofendidu, no nia direitu ne’ebé violadu ne’e proteje liuhusi kriminalizasaun. Definisaun ne’e puru-legalista tanba hatuur vítima tuir limite lei nian. La’os konstrui vítima hosi ema ne’ebé hasoru aktu kriminál ida, maibé hosi definisaun lei nian [aktu ne’ebé kontra lei]. Aleinde puramente legalista, definisaun ne’e filozófikamente idealista.

Perspetiva klásiku kona-ba vitimolojia estuda, analiza no kualifika de’it vítima hosi aktu kriminál ida, katak nia ponto de partida mak kriminalidade. Halo ida-ne’e hodi aplika lei ne’ebé idealmente previstu ona iha Kódigu Penál. Maske nune’e, ida-ne’e la reprezenta vítima, no dalaruma vítima la konsege hetan lia-loos. Tan ne’e, perspetiva foun kona-ba vitimolojia hateten katak vítima mosu hosi nia relasaun sira iha sosiedade, nune’e hodi katak ema ida sai vítima la’os de’it tanba ema-seluk halo aktu kriminál ruma kontra lei hodi ofende nia direitu, maibé tanba kauza hosi funsionamentu estrutura sosiál ida.

Vitimolojia krítiku ne’e, tuir Gosita, haree katak prosesu hamosu ema-ida sai vítima tanba vitimizasaun estruturál, iha ne’ebé indivíduu ne’ebé pratika aktu kriminál ruma tanba ejizénsia estrutura sosiál hanesan interese [relasaun podér], valór sosiál, norma no status (Indah, 2014). Ka, tuir Sahetapy, prosesu aparesimentu vítima ne’e mós hanaran vitimizasaun polítika, iha ne’ebé ema-ida uza nia podér hodi fó prejuizu ba ema-seluk (ibid).

𝗣𝗿𝗼𝘁𝗲𝗷𝗲 𝗩í𝘁𝗶𝗺𝗮

Proteje vítima la’os akontese de’it iha momentu andamentu prosesu judidiál. Dalaruma, ita hanoin katak wainhira prosesa no kriminaliza ona arguidu [kondenadu] maka vítima hetan ona protesaun. Maibé, tuir perspetiva vitimolojia, protesaun ba vítima tenki hahú kedas hosi momentu ne’ebé akontese aktu kriminál, prosesu investigasaun to’o desizaun tránzitu eínjulgadu. Kuandu sosiedade no investigadór sira [polísia] la foti pozisaun iha vítima nia sorin maka ema ne’ebé vítima ona bele sai vítima dalarua [second victimization].

Pozisaun iha vítima nia sorin hodi suporta nia ba buka lia-loos no rekupera nia direitu. Wainhira ita proteje vítima, desde hosi akontesimentu, signifika katak ninia pozisaun klaru ona perante aktu kriminál ida. Primeiru, vítima prezente iha prosesu nu’udar de’it sasin ba nia-an hodi esplika kronolojia akontesimentu. Segundu, vítima nu’udar parte ne’ebé hetan prejuizu no ejize rekuperasaun (Indah, 2014).

Durante ne’e, kestaun kriminalidade la foku ba rezolve problema ne’ebé vítima hasoru. Maibé, atentu de’it iha kapturasaun no penalizasaun ba arguidu. Dalaruma, ita senti satisfeitu ona wainhira arguidu tama kadeia. Maibé, oinsá ho rekuperasaun direitu vítima nian? Purezemplu, asédiu seksuál entre dosente ho estudante. Ita satifestiu kuandu dosente tama kadeia. Maibé, oinsá ho relasaun podér no abuzu podér iha kampuz? Penaliza de’it arguidu sei la rezolve direitu sosiál vítima nian ne’ebé tama ona iha perigu laran.

Vitimolojia foku ba pozisaun vítima nian. Vítima ne’ebé nu’udar feto, oinsá tenki rezolve atu asédiu seksuál bazeia ba relasaun podér labele akontese tan iha kampuz ka iha fatin seluk, ba nia ka ba ema-seluk. Tanba vítima la’os ema ida, maibé estruturalmente iha vítima barak. Mendelson, peritu Direitu dahuluk ne’ebé koalia kona-ba vitimolojia, realsa katak vitimolojia tenki sai siénsia ketak no autónoma, tenki iha ninia instituisaun rasik no tenki husik atu dezenvolve ba moris-di’ak no progresu umanidade nian [ibid].

Pozitivizmu-legál defende katak penalizasaun nia finalidade maka atu eduka kriminozu hodi ikusmai reintegra ba sosiedade. Enkuantu, vitimolojia ke’e problema hosi pozisaun vítima nian no buka lia-loos hodi prevene vítimizasaun estruturál. Objetivu hosi vitimolojia mak alkansa prosperiedade. Proteje vítima nu’udar parte integradu ida hosi protesaun ba sosiedade hodi atinje hamutuk bein komún no prosperiedade ba ema-hotu.

Tuir Muladi [(Indah, 2014), nesesidade ba protesaun vítima hosi aktu kriminál tanba iha razaun tolu: primeiru, proteje vítima no penaliza aktu kriminál hodi proteje mós valór komún sira ne’ebé institusionaliza iha sosiedade, hanesan liberdade, demokrasia, igualdade, naun-diskrimasaun, nsst; segundu, Estadu tenki proteje sidadaun sira-nia direitu fundamentál no direitos humanos; terseiru, proteje vítima hodi rezolve problema sosiál no alkansa prosperidade ba umanidade.

Wainhira ita hola pozisaun iha vítima nia sorin desde hosi akontesimentu, investigasaun to’o desizaun finál maka vítima sei hetan lia-loos no justisa. Nune’e, iha kazu asédiu ka agresaun seksuál ruma, ita presiza hasai ita-nia an hosi valór patriarkál sira be konstrui vítima no inferioriza feto. Faktu atuál, mane ne’ebé baku feto iha Taibesi. Ita presiza foti pozisaun iha vítima nia sorin hodi deskobre lia-loos tuir dalan legál, kriminaliza violénsia estruturál hasoru feto no prevene violénsia ba feto hotu-hotu.

𝗗𝗲𝘀𝗸𝗼𝗯𝗿𝗲 𝗟𝗶𝗮-𝗹𝗼𝗼𝘀

Maske prosesu legál seidauk la’o, maibé, desde akontesimentu kazu agresaun seksuál ruma, ita tenki hatuur-an hamutuk ho vítima. Hosi pozisaun ne’e mak ita konstrui vítima nia kualidade hodi partisipa iha prosesu legál. Ida-ne’e mak sosiedade ohin-loron la halo. Pelu-kontráriu sira hatuur fila-fali vítima nia pozisaun nu’udar ema sala-na’in. Balun foti pozisaun netrál. Sorin-seluk, iha movimentu balun ne’ebé maka frankamente fó apoiu ba vítima.

Hola pozisaun iha vítima nia sorin ne’e hanesan forma protesaun inisiál ida ba vítima. Tanba paradigma vitimolojia foun mosu hodi foku ba pozisaun vítima nian, katak “what can be done about victims, not only criminals?” Tanba ita hatene ona katak perspetiva vitimolojia nia objetivu maka defende ema-nia sofrimentu [human suffering] no progresu ba umanidade.

Suporta vítima hodi deskobre lia-loos tanba krime ne’ebé halo hosi ema-ida ne’e kontra umanidade. Richar Quinney (2014) hateten katak krime nu’udar formulasaun hahalok umanu ne’ebé kria husi ukun-na’in sira iha sosiedade ne’ebé organizadu politikamente, no krime nu’udar formulasaun hahalok ne’ebé fó ba ema lubuk ida hosi ema seluk, nune’e, krime nu’udar buat ida ne’ebé ita mak kria.

Quinney (2014) argumenta katak aktu kriminál ne’ebé hamosu vítima no protesaun ba vítima labele la’o separadamente. Rua ne’e nu’udar konstrusaun sosiál ida. Nune’e, vítima ne’ebé mosu mós la’os ida de’it, maibé rua: primeiru, vítima konkretu, mak ida-ne’ebé mosu fízikamente nu’udar parte ne’ebé hetan prejuizu perante aktu kriminál ruma; no vítima abstratu, mak ida-ne’ebé ita la haree ka naksubar iha nia kotuk. Vítima abstratu ne’e mosu tanba krime ne’ebé bazeia ba relasaun podér no abuzu podér, katak krime ne’ebé kontra umanidade tomak, violénsia estruturál hasoru umanidade ne’e nu’udar vítima abstratu.

Definisaun kona-ba krime [sé mak autór no vítima] ne’e nu’udar prosesu konstrusaun sosiál ida. Tanba ne’e, atu define loloos kona-ba krime ida sempre iha interasaun entre sujeitu sira, mak hanesan: autór, vítima no autoridade polisiál. No, sujeitu sira ne’e integra iha totalidade ida, sosiedade. Iha prosesu interasaun ne’e, komunidade tenki foti pozisaun iha vítima nia fatin hodi deskobre justisa ka lia-loos. Tanba, posibilidade, vítima nia lian bele lakon iha prosesu interasaun nia laran kuandu autór no meiu-investigasaun la imparsiál, ikusmai vítima la hetan justisa.

Asédiu seksuál nu’udar krime ida ne’ebé ita-nia lei prevee iha Kódigu Penál Timor-Leste. Nu’udar krime, vítima bele hato’o keixa kuandu iha kazu asédiu seksuál, ka bele mós, independentemente hosi vontade vítima nian, ema-seluk bele halo partisipasaun liuhusi denúnsia ba autoridade kompetente. Tanba asédiu seksuál bele kriminaliza liuhusi tipu krime agresaun seksuál. Maibé, perspetiva vitimolojia realsa katak kuandu iha krime agresaun seksuál ruma, sosiedade tenki foti pozisaun iha vítima nia sorin hodi suporta nia ba keixa ka denúnsia atu deskobre lia-loos.

Mundu rai-klaran konkorda ona, se vítima ruma ne’ebé hato’o keixa kona-ba kazu agresaun seksuál maka públiku tenki fiar ba deklarasaun vítima nian [hamutuk ho vítima] to’o rezultadu investigasaun katak suspeitu sala-laek. Tanba Konstituisaun RDTL mós garante liuhusi nia artigu 26.° katak Estadu asegura ema-hotu asesu ba tribunál hodi defende nia direitu no interese ne’ebé lei proteje. Maibé antes ba dala legál, ita presiza husu ita-nia an: ita foti ona pozisaun hodi proteje vítima ka lae?

Illustrasaun: VIKTIMOLOGI DIGITAL ART Z-Ray @pengikut

 283 Tatal Lee,  3 Views Today