Dilí, yokalaumedia.com (11/11/2024) – Liu-husi selebrasaun ba masakre santa Krúz iha ne’ebe Jovén lubuk, ho atén brani sakrifika sira nia vida tan hakarak atu Rai ne’e livre no Povu ne’e mos livre, eín sentidu livre husi invazór sira nia ezisténsia ke iha altura ne’ebá nakonu diskriminasaun, esplorasaun, opresaun liu-liu injustisa sosiál. Tanbá fazeadamente iha konstrusaun Estado sempre selebra loron ida ne’e, nu’udár oportunidade ba sidadaun tomak hodi hanoin hikas ba kotuk oinsa hateke ba oin ho dame, justisa no prosperiedade ba sosiedade eín jerál.

Masakre Santa Krúz, nu’udár momentu ida importante ba sosiedade Timór, liu-liu foinsa’e sira prezente nune’e kuda nafatin espiritu patriotizmu no nasionalizmu, nune’e kria nafatin paz no estabilidade iha ita nia konseitu Estadu de Direitu Demokrátiku ida ne’e, tanbá normalmente husi ibun ba ibun sempre ko’alia katak Juventude mak ai-ri’in ba Povu no Raí ida ne’e,

“Masakre santa krúz, ne’e movimentu juveníl ida para atu hatutan luta libertasaun Nasionál, tanbá ne’e maka luta ida ne’e tenke sai valór ida ne’ebé motiva, valor ida ne’ebé maka fó espasu ba jovén sira para atu hamri’ik fila fali. Katak prosesu konstrusaun Estadu no konstrusaun Nasaun presiza teb-tebes papel juventude sira para atu bele ense I atu bele kontinua, tanbá ne’e maka partidu demokrátiku fó esperansa bo’ot ba  jovén sira, imi mak nain bá rai ida ne’e, imi mos kontinuidade ba espiritu eroi sira nian liu-liu kontinuidade ita nia rai ba oin”, dehan Vice-Primeiro Ministro Mariano Assanami sabino .

Lideransa Másimu husi Partidu Demokrátiku ne’e mos salienta katak, fó parabénz ba Jóven sira ohin loron, tanbá konsidera loron ida espesial liu ba Foinsa’e sira, maske nakonu ho triste wainhira hanoin fali ba kotuk, maske nune’e ita mos kontente tanbá liu husi dalan ne’e maka inspira fila-fali atu kontinua ba oin.

“Loron masakre santa kruz, 12 de novembru  mos sai hanesan loron  ba juventude Nasioál tanbá ne’e maka parabéns ba imi, selebraloron Nasionál  ita triste tanbá  jovén lubuk ida lakon iha 12 de novembru ne’ebé au-mesmu tenpu ita kontente tanbá sira inspira  imi atu luta kontinua no sakrifika Imi nia an para atu bele hetan moris di’ak ba povu Timor-Leste”, salienta Assanami.

Trajedia moruk 12 de novembru tinan 1991 refere, rezulta ema 271 ne’ebé halakon sira nia vida iha batailla, ho sakrifisiu bo’ot ne’ebé jovén sira dedika maka konsege doko mundu nia kakutak no fuan, enkuantu faze tu’ir mai Timor-oan konsege kore-an husi Integrasaun ba provinsia 27 ba Indonézia liu husi referendu (konsulta popular), ohin hanaran Repúblika Demokrátika de Timor-Leste (RDTL).

Reporter : Cedelizio Rego

Revizor : Joanito Rangel

 165 Tatal Lee,  4 Views Today