Dilí, http://yokalaumedia.com (12/11/2024) – komemorasaun masakre santa kruz ba tinan ne’e ho tema “ORGULU HO ITA NIA ISTÓRIA NO HAMUTUK DEZEMVOLVE ITA NIA NASAUN IDA PROSPERU IHA FUTURU” ba dala XXXIII iha santa cruz Dilí.

Prezidente organizadora Komite 12 de Novembru, Filipe Rodrigues, husu ba juventude rezisténsia ne’ebé fó kontribui maka’as ba luta libertasaun nasaun nian no husu mos  ba joven sira agora hodi kontribui maka’as ba dezenvolvimentu estadu nian.

“Husi prosesu moruk ne’ebé joven rezisténsia sira halo iha  pasadu maka hodi sosa estadu ida ne’e ne’ebé hamrik hanesan estadu soberanu ida. Ba joven agora tenke buka atu hakas aan atu estuda maka’as hodi luta ba dezenvolvimentu estadu ida ne nia. Agora dadaun Governu fasilita timoroan hotu eskola gratuita hahú hosi Pre-Eskolar to’o sekundariu, joven sira tenke estuda maka’as atu hetan valor di’ak hodi tama iha Universidade públiku ne’ebé baratu, la iha razaun atu joven sira lakoi ba eskola,  tamba imi mak futuru nasaun nian” dehan Felipe iha nia intervensaun.

Nia afirma katak Masakre Santa Cruz nu’udar funu joventude rezistensia nian no funu sidade nian ne’ebé sai oksijenia atu tulun funu tomak iha teritoriu nasionál iha frente armada no klandestina iha tempu ne’ebá. Hanoin fila fali ba tinan 33 liu ba  joven barak  mak iha sidade Dilí komesa halai namkari buka fatin hodi subar iha komunidade sira nia uma, balu fakar sira nia  raan iha fatin ida  ne’e tanba  ho objetivu ida de’it katak ukun rasik aan.

“Hanoin hikas ba pasadu iha tempu hanesan agora ne’e ita ne’ebé sei moris barak mak halai namkri, balu ba buka ema nia uma atu subar, balun mate no fakar  sira nia ran iha fatin ida ne’e, barak mós hetan torturasaun no kapturasaun hosi militar Indonézia nian , luta sira ne’e hodi hodi kontribui ba ita nia ukun rasik aan, ikus ita hetan duni liberdade”  dehan nia.

Enkuantu Nia  mos hatutan katak  bainhira mosu masakre Santa Cruz joven barak fó aan ba mate, la’ós de’it joven FRETILIN maibé APODETI, UDT nia oan barák mós fó hotu sira nia kontribuisaun hodi mate ho kilat musan Indonézia nian iha farin ida ne’e.

Relasiona ho tema ba komemorasaun masakre santa cruz ba dala XXXIII, David de Caevalho hanesan sidadaun ida nia kestiona ho tema ne’e tamba hare ba realidade la tulun tebes estadu ida ne’e sai estadu ida prosperu  iha futuru.

“Ha’u preokupa ho ita nia lider sira agora ne’e kolia borak ba povu nia moris diak infelismente desizaun ne’ebé sira foti ne’e la reprezenta povu ida ne’e, tamba povu sei halerik ba edukasaun, saude bee mos eletrisidade no mos kampu trabalLu. No balun seidauk senti no goza lolos ukun aan ida ne’e tma ne’e susar bai ta atu to’o iha estadu ida prosperu no fraternu iha future”, dehan David.

Tuir observasaun jornalista yokalaumedia.com nota katak partisipate ne’ebe mak partisipa masimu iha komemorasaun ida ne’e  mak joven rezisténsia sira,lider eix titular sira, Presidenti Repúblika no membru governu sira.

Jornalista : Joanito Monteiro.

 87 Tatal Lee,  2 Views Today