Dilí, yokalaumedia.com (20/11/2024)-Autoridade Seguransa Polísia Nasionál Timor-Leste (PNTL) hetan apoiu husi Sekretaria Estadu ba Igualidade (SEI) ho UN-WOMEN iha Timor-Leste lansa kampaña loron 16 aktivizmu kona-ba Violensia bazeia ba Jéneiru iha Timor-Leste.

Komandante Jerál PNTL, Komisariu Jerál Polísia Henrique da Costa esplika katak  liu kampanha refere bele fanun liu tan membru Polísia nasionál Tomor-Leste sira atu Sosializa konaba lei prevensaun Violensia hasoru feto no labarik feto iha Timor-Leste.

“Ita hatene katak iha Timor-Leste krime hasoru feto no labarik feto ita hanaran violensia domestika, ne’e aas tebes iha ita nia rain, nune’e ita servisu hamutuk ho parseiru sira ne’ebé iha hodi halo prevensaun no reduz kazu krime hasoru feto no labarik feto sira,” esplika Henrique.

Nia subliña katak, aktividade kampaña loron 16 ne’e sei halo iha Munisípiu hotu tanba hetan apoiu husi Ministeriu Interiór, Sekretaria Estadu ba Igualidade(SEI), UN-WOMEN iha Timor-Leste no TLPDP(Timor-Leste Police Development Programe).

“Ita sei prepara pontu fokal sira iha PNTL, atu iha loron-25 fulan ida ne’e  tun ba Munisípiu hotu-hotu atu halo sosializasaun no sei envolve mos Autoridade lokál, Veteranus ho joventude sira atu halo prevensaun ba violensia hasoru Feto no Labarik Feto iha Timor-Leste,” akresenta komandante.

Atividade refere si realiza iha loron-25 falan Novembro tinan ne’e ho tema “Hamutuk ita prevene no hapara violénsia hasoru feto no labarik feto iha Timor-Leste.

Enkuantu Iha fatin hanesan, Sekretária Estadu ba Igualidade (SEI) interinu Sekretáriu Estadu Komunikasaun Sosiál (SEKOMS) Expedito Dias Ximenes haklea’na katak kampaña refere sei realiza hahu husi loron 25 Novembru neʼebé ONU deklara hanesan Loron Internasional ba hapara violénsia hasoru feto no labarik feto no sei termina iha loron 10 fulan Dezembru no kampaña ne’e ho tema “Hamutuk ita prevene no hapara violénsia hasoru feto no labarik feto iha Timor-Leste”.

“Sekretariu Estadu ba Igualdade hamutuk ho entidades tomak ita sei hahú abertura ba Kampaña ne’e iha suku Builale, Postu Administrativu Ossu, Munisipiu Vikeke iha loron-25 falan Novembru no sei remata iha Dili, iha loron-10 fulan Dezembru tinan ne’e tmab loron ba Direitu Umanus ne’ebé fo enfaze katak Violénsia Hasoru feto nu’udar Violasaun kontra umanidade, “ informa Expedito.

Nia hatutan katak, Violensia hasoru feto no labarik fero hanesan violasaun ba ema nia direitu fundamental ne’ebé  paratika iha Mundu tomak inklui iha Timor-Leste. Kazu refere maoria akontese iha teritoriu tomak no okupa lista dauluk iha lista  PNTL nian. Tanba ne’e sekretaria Estadu ba Igualdade (SEI), hala’o papel importante tebes no kolabora ho entidades sira seluk, inklui PNTL hodi luta komtra velensia refere tuir Planu Asaun Nasional hasoru Violensia Bazeia ba Jéneru no enkuadramentu internasional sira hanesan rekomendasaun CEDAW.

” sekretaria Estadu ba Igualdade (SEI), hala’o papel importante tebes no kolabora ho entidades sira seluk, inklui PNTL atu kombate violénsia hasoru feto no labarik feto, Ohin loron ita agradese tanba PNTL foti inisiativa atu hahú esforsu hirak ne’e hodi hamutuk prevene violensia hasoru feto no labarik feto iha teritória tomak. Ita bo’ot sira nia kontribusaun no dedikasaun ba Prevene Violensia Bazeia ba Jeneru, ne’ebé trasa ona iha Planu Asaun Nasional ba Violénsia Bazeia ba Jéneru 2022-2032,” informa nia.

Nia mos informa katak, iha fulan ida ne’e, PNTL lansa ona estratėjia ne’ebé aliña ho Planu Asaun Nasional daruak 1325 Timor-Leste nian kona-ba Feto, Páz no Seguransa (2024- 2028) atu promove feto sira-nia partisipasaun ne’ebe igual ba harii pas ne’ebé sustentável iha rai laran.

“Ita hotu nia esforsu tomak laos deit remata iha ne’e loron 16 ativizmu kontra violénsia hasoru feto, maibė, ita sei kontinua halo esforsu makaas iha instituïsaun ida-idak no ita sei nafatin servisu makaas hodi kontra diskriminasaun sira ne’ebé feto sira hasaru hodi impede sira nia dezenvolvimentu iha pubika, sei luta hasoru mos injustisa sira iha uma laran ne’ebé barak liu sei fo prioridade ba mane duke feto, alende ida ne’e sei luta hasoru kultura hirak ne’ebé mak fo todan ba feto,” informa nia.

Tanba ne’e luta ba hapara violénsia hasoru feto no labarik feto laos deit atu atinji igualdade jéneru, maibė atu harii futuru jerasaun foun neʼebé livre husi violénsia ho forma oin-oin hasoru feto no labarik feto sira, ne’e duni, hahú ohin hateten lae ba violénsia hasoru feto no labarik feto sira iha Timor-Leste.

Nune’e mós Ofisiál UN-WOMEN iha Timor-Leste, Lumena Freitas salienta katak, Kampaña loron 16 Ativizmu nian ne’e hanesan movimentu global hodi konsensializa no bolu ita atu foti asaun sira hodi halakon violénsia bazeia ba jéneru.

“Kampaña ida-ne’e, ativista sira mak hahú iha tinan 1991 iha momentu sira halo inaugurasaun ba Institutu Lideransa Global Feto nian no to’o ohin loron, komunidade internasional no lokal, grupu no individu sira iha mundu tomak kontinua organiza kampaña anual ida-ne’e hodi halo advokasia ba hakotu violénsia bazeia ba jêneru, inklui violénsia hasoru feto no labarik-fato sira,” saienta Lumena Freitas.

violénsia kontra feto no labarik-feto  ne’e nu’udar fenomena ida ne’ebé akontese iha mundu tomak, ne’ebé pratika husi ema sira be iha poder no hasoru ema ne’ebé la iha poder ka ema baibain liu-liu feton sira. mai Ita Hamutuk luta no halakon Violensia Kontra Feto no Labarik Feto aira iha Timor-Leste.

Jornalista: Joanito Rangel.

 323 Tatal Lee,  3 Views Today