Veteranu Somotxo no Kasian husu Funu-na’in sira tenki unidu hodi lori ksolok ba povu

Dili-yokalaumedia.com-(3/3/2023), Timor-Leste komemora Loron Nasional Veteranu ba dala VI ne’ebe monu iha loron 3 Marsu 2023 ho tema “Hametin Unidade ba Desenvolvimentu Nasional”, iha palásiu Governu.

Komemorasaun ne’e nu’udar loron reflesaun ida ba funu-na’in sira, tanba iha loron 3 Marsu 1981 liu ba, sai loron realizasaun konferensia Nasional iha Maubai, iha ne’ebe hahu estabelese fali ligasaun resistensia ne’ebe lakon hafoin baze apoiu rahun. Konferensia 3 de Marsu ne’e sai nu’udar faze renascimentu luta armada nian hodi hasoru inimigu ba kauza ukun rasik-an.

Iha tinan 2023, Timor-Leste komemora loron 3 de Marsu nu’udar loron nasional veteranu nian

Veteranu Jose Agostino Sequeira Somotxo hatudu nia laran ksolok tanba iha loron ne’e halo nia bele refleta fali akontesimentu oi-oin iha pasadu.

“hau sente kontente tamba ami veteranu sira, iha loron ohin, hanoin fali ba loron 3 de Marsu 1981, husi loron nee mak ami reorganiza malu fila fali tanba uluk ne’e ita nia rezistensia la’o de’it iha Ponta Leste, portantu liu husi re-organizasaun ne’e mak ita fahe inimigu nia forsa ne’ebe mak eziste iha iha fatin hotu-hotu.”, Haktuir Somotxo ih CCD.

Deputadu ne’e mos kontinua husu ba líder históriku sira atu tur hamutuk hodi lori ksolok ba povu.

“lider sira husi 1975, ne’ebe mak sei moris no ohin lidera hela partidu politiku sira atu tur hamutuk koalia ba malu, enkuantu seguidor sira labele sunu tan nune’e bele agrava liu tan situasaun”, husu Deputadu.

Ex-Ministru Defesa nee mos afirma liu tan katak tinan barak mak lider sira defende sira nia ideolojia politika.

Entretantu, Veterana Kasian mos husu ba Lider sira atu halo politika hodi desenvolve rai no povu, espesialmente tau matan faluk no oan ki’ak sira.

“Hau husu maun bo’ot sira hamutuk ho veteranu hadia ita nia rain. Labele halo politika barak liu tan politika bele lanu ita, halo politika sukat atu bele hadomi ema hotu nia moris, hadomi desenvolvimentu”, husu Madalena Bidau Soares.

Veterana ne’e mos hatudu nia laran susar tan lider resistensia sira hanesan Kay Rala Xanana Gusmão, Marí Alkatiri, Lu-Olo, Presidente Repúblika José Ramos Horta, Primeiro-Ministro Taur Matan Ruak no lider rezistensia seluk tan ne’ebe la marka prezensa iha komemorasaun Loron Nasional Veteranu ba dala VI.

Reportagem : Eva Ximenes

 276 Tatal Lee,  1 Views Today