Dili- yokalaumedia.com (14/03/2023) – klube premeiru devizaun Liga Futebol Timor Leste LFTL Ad SLB Laulara lidera hikas Tabela klasifikasaun Provezorio liga Timorense epoka 2023, hafoin latan nia adversáriu Akademika Fc ba rai ho skor 2-0, jogu ne’ebe realiza iha estádiu munisipal Dili tersa-feira nee.

Jogu hahú liu de’it menutu 6, Makikit Laulara muda eskor bá 1-0, jogador ho kamizola númeru 26, Michel Hutabarat, fura rede Akademika Fc hafoin simu bola ne’ebe kruza husi Bakyoka iha parte karuk.

Hafoin sofrimentu ne’e, Akademica Fc hasa’e intesidade jogu hodi fó presaun ba Ad SLB nia grande area, maibé defende maka’as husi jogador lateral sira ne’ebe komanda husi Felipi Oliveira hodi la fó fatin bá avansadu sira atu halo impata skor refere.

Akademika Fc, iha Menutu 30 hetan oportunidade osan mean ida, suta livre iha ne’ebe hala’o husi Alexandre da Cruz, maibé guarda rede Ad SLB, Andrew Mensah, koñsege salva hodi baku sai bola ba li’ur.

Ad SLB hanesan ekipa ne’ebé mak domina husi jogador esperiénte iha selesaun nasionál ladún hatudu sira nia jogu husi ain bá ain tanba Akademika Fc ameasa bebeik sira liu husi suta livre, falta no kantu bá sira nia rede.

Iha minutu ikus, molok atu termina premeira parte, jogador ho kamizola númeru 11, Hilario Ximenes, lori Akademica Fc atu hamihis  skor, maibé bola ne’ebé mak nia lansa iha liña penalidade laran kontinua salva husi Andrew Mensah.

Treinador Akademica Fc Luizinho dos Santos muda tatika jogu, bainhira kontinua bá segunda parte, hodi joga ho bola badak, ain bá ain, enkuantu Ad SLB responde ho teki taka.

Liu tiha minutu balun, treinador Ad SLB Laulara, Juliao Monteiro, halo mudansa ba jogu hodi troka avansadu Mouzinho da Lima ho Alexandro Lemos hodi reforsa liña avansadu. Mudansa ne’e konsege duni fo resultadu di’ak ba ekipa Makikit Laulara, hafoin Kornelis Portela Doko (11) rede Akademica Fc bainhira simu asistensia bola husi Alexandro Lemos hodi lori Ad SLB ukun ho eskor 2-0.

Akademika ne’ebe mak sofre ona golu rua ne’e, ikus mai nia kapitaun Joel Gaiu mos hetan kartaun mean tanba protesta Árbitro Eufrasio da Costa Silva.

Resultadu ne’e halo Ad SLB lidera tabela klasifikasaun tanba manan dala rua, inpata ida no rekolla ona Pontu 7, enkuantu Akademica Fc hetan manan dala ida, inpata ida no lakon dala rua no rekolla de’it Pontu 4.

Reportagem : Énio Costa

 210 Tatal Lee,  2 Views Today