Dili, yokalaumedia.com– (15/2023), Prezidente Komisaun Nasional Eleisaun (CNE- sigla portugéz), Jose Agustinho Belo, hala’o sorumutu ho Estrutura superior husi komunidade protestannte iha rezidensia Igreja Protestante Timor-Leste (IPTL Sinodo Comoro) iha tersa-feira, 14/03 ne’e, atu fo susesu ba eleisaun parlamentar 2023.

Fo hanoin fali katak Presidente no Komisáriu Nasionál Eleisaun hala’o, iha segunda-Feira,9/2/23, hodi rona mos hanoin balun ba realizasaun festa demokrasia ne’e.

Hafoin sorumutu iha IPTL-Sínodo Komoro, Komisaun Eleisaun Nasionál, “Jose Agustinho Belo” hateten sorumutu ne’e importante tanba tempu kampañe besik ona no partidu politiku barak mak sei hola parte.

“CNE mos hanoin labele la’o mesak ho razaun ne’e mak sempre dehan partisipasaun ema hotu nian importante, liu-liu konfisaun relizioju sira nia papel, opiniaun, fe spiritual, razaun de ser ka ideia sentral sira atu atende ba eleisaun parlamentar ne’e ho di’ak”, hateten José Belo.

Presidente CNE ne’e mos kontinua alerta ba entidade hotu atu komprende sala prosedimentu legal no justisa sosial iha tempu eleisaun nia laran.

“Ita hatene katak CNE nu’udar órgaun independente, imparsiál no transparante perante partidu politiku hotu-hotu, bainhira aktu ruma ne’ebe mosu kontra prosedimentu legal sira, sei prosesa tuir lei, maibe aktu sira insulta, hatun malu ne’ebe kada tinan-lima akontese iha tempu kampana ne’e bebeik, maibe labele haluha katak ita mos iha justisa sosial ne’ebe povu maka julga tuir sira nia konsienisa votu”, esklarese Belo

Iha fatin hanesan, Prezidente Igreja Protestante Timor-Leste (IPTL) “Domingos Alves” sente orgullu ho prezensa CNE nian hodi rona mos sira nia hanoin balun no hateten katak sira komprometidu apoiu realizasaun Eleisaun iha tinan ne’e tanba igreja asume mos papel importante ida iha Timor-Leste.

“ami apoia 100% tanba igreja nia papel mak lori dame, domin, unidade no pas.  Iha ne’e mos ami reza atu Na’i haraik grasa no bensaun atu Timor-Leste mos sai ezemplu ba nasaun sira sira seluk, tanba ita hotu hakarak eleisaun ne’e la’o ho di’ak,”, haktuir Prezidente IPTL.

Líder igreja Protestante ne’e mos konsiente katak ema hotu bele tama partidu ketak-ketak maibe objetivu ida de’it atu lori desenvolve Timor no  lori moris di’ak ba povu.

Reportagem : Cedelizio Rego

 251 Tatal Lee,  3 Views Today