Dili-yokalaumedia.com (15/03/2023) Klube promovidu primeira divizaun Liga Futebol Timor (LFTL), Fc Portu Taibesi Haterus nia adversáriu Assalam Fc ho eskor 3-0 iha jornada datoluk liga Timorense epoka 2023 ne’ebé mak hala’o iha estádiu munisipal Díli kuarta-feira ne’e.

Ekipa hafurak kampu ho jogador sira ne’ebe diferenti, tanba Assalam Fc hatun jogador estranjeiru na’in 3, enkuantu Portu Taibesi responde ho jogador lokál.

Treinador Fc Portu Taibesi, Miro Valdo Bento, fiar A’an inisia jogu ho kalma, bola ain bá ain, hodi difikulta Assalam Fc atu hetan bola.

Liu de’it minutu balun, Fc Portu Taibesi hetan kedas oportunidade di’ak hodi lansa bola falta ida husi jogador Anggisu Barboza iha liña penalidade kotuk, maibé la konsege hamosu resultadu ruma tanba bola ne’e kona de’it iha besi rin baliza nian.

Maske hetan Ameasa husi Fc Portu Taibesi liu husi suta livre Dala rua, falta dala tolu no kantu dala ha’at, Assalam Fc defende ho di’ak to’o oras primeira parte termina mos eskor mantein 0-0.

Kontinua bá iha segunda parte, Miro Valdo Bento, muda ritmu jogu liu husi substituisaun jogador Jardel Peidade ho jogador estranjeiru Yohanes Jehaman hodi reforsa iha liña avansadu.

Subtituisaun ne’e hahoris duni resultadu pozitivu hafoin Jogador Yohanes Jehaman fura rede Assalam Fc iha minutu 50, bainhira simu asistensia husi Inocensius Ati hodi hasai eskor bá 1-0.

Assalam Fc tenta duni tuir eskor liu husi asaun ne’ebé mak Elias Mesquita halo, maibé defeza Anggisu Barboza la fó Fatin bá sira atu hakat ho bola to’o rede Portu Taibesi.

Treinador Assalam Fc, Gaspar Amaral, muda estratéjia jogu no hatun tan jogador estranjeiru Rahmatula Ghanizada no Alexander Weber hodi haforsa liña avansadu.

Mudansa ne’ebé mak Gaspar Amaral halo, hanaruk liu tan de’it dalan atu manan, tanba iha minutu 73, sofre tan golu ida hafoin Edencio da Costa fura rede Nathaniel Agbozo liu husi suta bola falta.

Árbitru konsege dada tan minutu 10, maibe Assalam la konsege duni tuir Portu. Iha tempu extra 90+6 jogador Yohanes Jehaman rejista tan nia naran iha kuadru eskor liu husi asaun  individu hodi nune’e muda eskor 3-0 to’o jogu termina.

Fc Portu Taibesi oras ne’e okupa terseru lugar iha tabela klasifikasaun ho Pontos 6, enkuantu Assalam okupa segundu Klasifikasaun ho Pontos 7.

Reportagem : Énio Costa

 199 Tatal Lee,  2 Views Today