Dili, yokalaumedia.com-(20/3/2023), Prezidente da Republika, Emprezariu AeroDili no Ministru Transporte no Telekomunikasaun inagura Aviaun ho marka A320 iha Aeroporto Internasional Nicolau Lobato Dili.

Lourencio de Oliveira, emprezáriu ne’ebe investe no halo negosiu iha área transporte aeru nian konsege duni konkretiza nia mehi ne’ebe sai mos hanesan timor-oan sira nia mehi atu iha rasik aviaun ruma ne’ebe semo ho Timor leste nia marka.

“Ha’u iha ona mehi katak  loron ruma ita sei iha aviaun rasik. Mehi ida ne’e maka foin akontese ne’e, mas no inisiu to’o iha ne’eba la’os ha’u mesak, maibe  ne’e, ha’u, presiza duni ema barak nia kontribuisaun. ita mos enfrenta desafiu barak maske nune’e ita la lakon vontade hodi kontinua hakat no to’o ikus aviaun ne’e mai duni dentru 16 meses deit”, esplika Lourenço ho ksolok.

Entretantu, Prezidenti Repúblika, José Ramos Horta, liu husi diskursu, hato’o parabens no apresia ho investimentu ne’ebe mak halo emprezariu timor-oan, na’in ba Aero Dili, Lourenço de Oliveira.

Ministeriu Transporte no Telekomunikasaun, José Agostinho da Silva, hateten inaugurasaun ne’e nu’udar momentu importante ida ba Timor-oan tanba ho korazen no aten brani konsege fo susesu bo’ot ida ba estadu no povu Timor-Leste hodi kompete ho setór privadu sira husi rai seluk.

“dader kmanek ida ne’e sai momentu ida inportante tebes ba kompana aero-Dili nu’udar setor privadu  ne’ebe koopera no kompana estrangeiru sira  hodi opera aviaun ho naran aero-Dili. Ohin ita hare’e aviaun ne’e tun mai iha ita nia aeroportu Dili ne’ebe  hatudu katak setór privadu iha Timor-Leste bele kompete ho sira ne’ebe mai husi rai liur”, afirma Ministro.

Agostinho Belo da Silva, akresenta liu tan katak ho prezensa aviaun dahuluk ida ne’e bele motiva timor-oan atu dezenvolve turismu, nu’udar setór produtivu ida ne’ebe bele mos aumenta rendimentu estadu.

Relativamente ho presu billete, kompaña Aero Dili mos tuir kustu ne’ebe iha merkadu.

Aviaun dahuluk ne’ebe mak sosa husi Lourenço de Oliveira ne’e ho marka Airbus A320.

Reportagem : Cedelizio do Rego

 241 Tatal Lee,  2 Views Today