Díli, yokalaumedia.com, (29/03/2023) Ministru Administrasaun Estatal, Miguel de Carvalho, realiza sorumutu ho Primeiru-Ministru, Taur Matan Ruak, hodi informa konaba preparasaun ne’ebe ministériu halo ba Eleisaun Parlamentar ne’ebe sei realiza iha loron 21 Maiu tinan ne’e.

Alende ne’e, iha sorumutu ne’ebe hala’o iha Palásiu Governu ne’e,Miguel de Carvalho mos informa Xefe Governu konaba informasaun balun relativamente ho inséndiu ne’ebe harahun dokumentu fíziku sira iha edifisiu Ministériu Administrasaun Estatal iha 23 marsu liu ba.

Hafoin enkontru, Ministru Administrasaun Estatal, ba Jornalista sira, rejeita katak konkluzaun ne’ebe públiku halo hodi hateten dehan inséndiu planeadu, tanba prosesu investigasaun seidauk konklui.

“insédiu ne’e hetan intervensaun imediata husi Autoridade Protesaun Sivil no Polisia Nasional Timor Leste. Entretantu, kazu ida ne’e, iha hela faze levantamentu dadus no  preparasaun relatoriu, no prosesu sira ne’e konklui ona mak ita foin bele hatene motivu lolos husi akontesimentu refere”, Informa Ministru.

Tuir Membru Governu ne’e katak inséndiu refere halakon ka estraga dadus sira ne’ebe ho forma manual (hard copy), maibe dadus sira ne’ebé ho forma online ne’e konservadu no sei útil nafatin ba servisu administrasaun nian.

Reportagem : Elmerito Costa

 339 Tatal Lee,  2 Views Today