Dili- yokalaumedia.com-(28/3/2023)-Embaixadór foun RDTL ba Reinu Unidu, João Paulo da Costa Rangel hala’o sorumutu kortezia ho Primeiru-ministru, Taur Matan Ruak, hodi simu orientasaun molok hala’o misaun estadu iha Reinu Unidu.

Diplomata timor-oan ne’e hateten orientasaun ne’ebe Xefe Governu tatoli mak hadia prestasaun Estadu ba sidadaun sira iha rai li’ur, tau matan ba timor-oan sira ne’ebe buka moris iha Reinu Unidu.

“buat ne’ebé ke ita nia maun-alin no inan-feton sira halo iha reinu unidu ajuda tebes ita nia nasaun no ita nia povu tanba ne’e Primeiru-Ministru husu atu servisu hamutuk ho entidades governamentál sira hodi bele mellora prestasaun servisu estadu nian ba iha ita nia maluk sira ne’ebé mak hela iha Reinu Unidu”, informa João Paulo.

Embaixador nomeadu ne’e mos kompromete atu buka meiu sira hodi fasilita timor-oan bele buka empregu iha Reinu Unidu no la presija adkiri ka husu atu sai hanesan sidadaun portugueza.

“espera iha ita nia misaun ne’e bele tenta posível atu timor oan sira bele ba direta servisu iha ne’eba tanba ha’u mos mai husi traballadór mak simu dezafiu ida ne’e ho responsabilidade no dedikasaun tomak atu buka posibilidade apoia ita nia ekipa embaixada iha Londrés, salienta nia.

Reprezentante Timor-Leste ba Reinu Unidu ne’e sei hahu nia mandatu iha fulan abril tinan ne’e to’o tinan 3 oin mai.

Reportagem : Nário Costa

 344 Tatal Lee,  2 Views Today