Dili, yokalaumedia.com (07/06/2023) – Sekretariu Estadu Protesaun Civil (SEPC) kontinua hametin kooperasaun ho F-FDTL no PNTL hodi responde ba Dezastre sira ne’ebe mak akontese iha Teritoriu laran bazeia ba lei protesaun sivil.

“ita fahe esperensia no organiza diak liu tan ita nia planu kona ba preparasaun no investigasaun ba dezastre no rekoperasaun ba dezastre ”, hateten Joaquim dos Santos, SEPC, iha Salaun Maubara, Plaza, Segunda-Feira, (05/06/2023) hafoin lidera semináriu.

Membru Governu ne’e mos haktuir tan katak kooperasaun entre instituisaun ho parseiru sira hotu ne’ebe partisipa iha semináriu ne’e hodi fahe matéria no esperénsia sira nune’e estabelese rede ida ne’ebe di’ak hodi bele koopera di’ak liu tan.

“Atu responde diak no lais liu ba ita nia komunidade ne’ebe hasoru dezastre no presisa tebes kooperasaun entre institusoes, ita nia parseiru ho komunidade atu bele atende lalais dezastre iha oras 24 nia laran no ita iha ona sistema ida bainhira akontese dezastre idak-idak hatene ona sira nia papel hodi responde ba dezastre ho di’ak no lais”, Esplika Joaquim.

Aleinde ida ne’e mos papel importante husi Protesaun Sivil mak fo atensaun no fo asistensia ba komunidade ne’ebe afetadu ba dezastre no fo xamada ba sira ne’ebe mak sidauk afetadu ba dezastre maibe hela iha area risku.

“Ami sempre fo xamada  atensaun ba komunidade atu labele hela iha area risku, no labele konstrui uma iha area risku sira”, subliña Joaquim.

Iha momentu hanesan sentru Sivil Militar Australia, Ikoro Suano, hateten objetivu husi workshop ida ne’e atu servisu hamutuk hodi prepara-an atu responde ba Dezastre ne’ebe mak atu akontese.

“Ohin ita realiza workshop ne’e hodi prepara ema hodi responde ba dezastre ne’ebe mak atu mai presisa servisu ekipa”, tenik Ikoro.

Partisipa iha semináriu ne’e mak Protesaun Sivil, PNTL, F-FDTL no sentru Sivil Militar Australia hanesan parseiru dezenvolvimentu ida.

Reportagem : Eva Ximenes

 1,715 Tatal Lee,  1 Views Today