Díli, yokalaumedia.com (25/07/2023) – Falta de’it ona tinan rua atu kompleta tinan 30 akontesimentu tsunami iha Timor-Leste (momentu ne’eba hanesan hela Provínsia Timor-Timur) tanba Iha loron 14 maiu 1995, akontese rai-nakdoko ne’ebé maka’as iha Tasi Flores iha tuku 11:33 UTC (20:33 OTL) iha ne’ebe ema na’in 11 lakon, 19 hetan kanek, no tsunami ho metru 1.5 estraga mos oin-oin iha área Dili, espesialmente iha Marinir Komoro (atuál suku Madohi) no harahun mos ro peska 40. Tuir istória estragu bo’ot balun ne’ebe akontese mos iha Maliana-Bobonaro. Iha relatóriu ida kona-ba subsidénsia ida-ne’ebé laiha ema ida mak haree fila-fali. Subsidénsia rai iha fatin balun iha tasi-ibun parte Oeste Timor-Leste, husi tasi-ibun Dili to’o Maubara. Subsidénsia rai ne’e hamosu Tasi ne’ebé sa’e metru 4 no luan área ne’ebé taka ho tasi ne’e mak metru 120 (luan area Subsidénsia mak maizumenus metru 550).

Relativamente ho asuntu istóriku ne’e mak Autoridade Protesaun Civil (APC) Timor-Leste, estabelese koperasaun ida ho Sentru Informasaun Tsunami Indiano Oceano UNESCO-IOC (Indian Ocean Tsunami Information Centre (IOTIC)) no Ajensia Meteorolojia Indonezia, Klimatolojia no Jeofisika (Badan meteorologi, Klimatologi da Geofisika (BMKG–Indonesia)) hodi buka tuir dokumentasaun kona-ba istória sira husi testemunhu okular (saksi mata) no sobrevivente sira husi Tsunami iha Dili durante loron 27-29 fulan-jullu tinan 2023 ne’ebe mak APC identifika ona hamutuk ema na’in 32 no sobrevivente sira iha suku Madohi, Tibar no Comoro ne’ebe sei fo sira nia testemunha atu komunika kona-ba efeitu Tsunami nian no disponibiliza informasaun sira-ne’e ba públiku.

Tuir dokumentu ida ne’ebe ekipa yokalaumedia.com asesu katak atividade rekolla informasaun ne’e nu’udar parte ida husi prezervasaun informasaun tsunami iha pasadu hodi prepara ba iha futuru ne’ebe organiza husi UNESCO-IOC Indian Ocean Tsunami Information Centre (IOTIC) ne’ebé ko-finansia ho BMKG.

“Iha programa IOTIC-BMKG ne’e nia okos, Istoria kona-ba tsunami iha pasadu hamutuk 319 hanesan (1945 Makran Tsunami; 1950 Ambon Tsunami; Central Sulawesi Tsunamis (1938, 1968, no 2018); 1992 Flores Tsunami; 1994 Banyuwangi Tsunami; 1996 Biak Tsunami, 2000 Banggai Tsunami) ne’e mak istória no informasaun sira ne’ebé hetan ona dokumentasaun”, haktuir iha dokumentu ne’ebe espalla husi media APC iha loron 25/07 ne’e.

Ardito M. Kodijat, reprezentante husi UNESCO-IOC Indian Ocean Tsunami Information Centre (IOTIC) hateten katak sira nia ekipa ida hodi halibur informasaun sira konaba akontesimentu tsunami.

“ami husi ekipa Sentru Informasaun Tsunami Indiano Oceano UNESCO-IOC servisu hamutuk ho BMKG hodi foka liu ba prepasaun edukasaun hodi aviza ou alerta ba komunidade sira ne’ebe mak rezide iha fatin sira hirak ne’e sai risku ba Tsunami, bainhira akontese fali iha futuru, bele akontese tinan 10 ou tinan 50 ba leten”, Afirma Ardito Kodijat.

Reprezentante sira husi IOTIC no BMKG, APC, Iha vizita ida-ne’e, sei organiza semináriu introdutóriu ida kona-ba UNESCO-IOC Tsunami Ready Rekonsiliation Program ne’ebé sei hala’o iha loron 31 Jullu – 1 Agostu 2023 hodi introdús programa rekoñesimentu internasionál bazeia ba komunidade UNESCO-IOC Tsunami Ready Rekonesimentu (TRRP) ne’ebe hari’i komunidade ida reziliente liu husi estratéjia sensibilizasaun no preparasaun ne’ebé sei proteje moris, kondisaun moris, no propriedade husi tsunami.

TRRP nu’udar xave atu alkansa objetivu Oseanu Seguru husi Dekade Nasoins Unidas nian Siensia Oseanu ba Dezenvolvimentu Sustentavel ho objetivu atu asegura katak 100% husi komunidade sira ne’ebé iha risku ba tsunami prepara ona no reziliente ba tsunami to’o 2030.

Autoriedade Protesaun Civil (APC) iha posibilidade hakarak mos implementa mos programa TRRP iha Timor-Leste hodi tama ba komunidade 41 iha nasaun 21 ne’ebé hetan rekoñesimentu husi UNESCO-IOC nu’udar komunidade Tsunami ne’ebé prontu.

Reportagem : Eva Ximenes

 2,685 Tatal Lee,  1 Views Today